Երկրաշարժից տուժած Ինդոնեզիայում հրաբուխ է ժայթքել

PanARMENIAN.Net - Ինդոնեզիայի Սուլավեսի կղզում, որը տուժել էր ավերիչ երկրաշարժից և ցունամիից, հոկտեմբերի 3-ին հրաբուխ է ժայթքել: Սոպուտան հրաբուխը, որի բարձրությունը 1800 մ է, մոխիր է սփռում մինչև 4 կմ հեռավորության վրա:

Մեծ ավերածությունների և զոհերի մասին տեղեկություններ չկան: Հրաբխի մոխիրը դեռևս սպառնալիք չէ օդային տրանսպորտի համար, հայտնում է ինդոնեզական արտակարգ իրավիճակների գերատեսչությունը, գրում է Deutsche Welle-ն:

Սոպուտան հրաբուխը երկրաշարժից և ցունամիից տուժած շրջանից մի քանի հարյուր կիլոմետր հեռավորության վրա է: Երկրաշարժից և ցունամիից 1400 մարդ է մահացել:

Ինդոնեզիայում 7,7 մագնիտուդով երկրաշարժը տեղի էր ունեցել սեպտեմբերի 28-ին: Ստորգետնյա ցնցումներից հետո կղզու վրա 2 մետրանոց ալիք է եկել: Արդյունքում հազարավոր տներ են ավերակների վերածվել,ինչպես նաև հյուրանոցներ, հիվանդանոցներ և առևտրի կենտրոններ: Երկրի նախագահը հանձնարարել է ընդունել միջազգային օգնությունը երկրաշարժի հետևանքների վերացման համար: Այդ մասին հայտնել է Ներդրումային համակարգող խորհրդի նախագահ Թոմ Լեբորգը:

Հոկտեմբերի 2-ին Ինդոնեզիայի ափերի մոտ նոր հզոր երկրաշարժ է տեղի ունեցել: 6,3 մագնիտուդով ստորգետնյա ցնցումը գրանցվել է օվկիանոսում՝ Սումբա կղզուց 66 կմ հեռավորության վրա: