Պապիկյան. Մարզպետարանների աշխատողների մոտ 30%-ը կկրճատվի

11 փետրվարի 2019 - 17:21 AMT

PanARMENIAN.Net - Մարզպետարանների աշխատակիցների մոտ 30%-ը կկրճատվի: Այդ մասին լրագրողների հետ ճեպազրույցում հայտարարել է ՀՀ տարածքային կառավարման և զարգացման նախարար Սուրեն Պապիկյանը՝ հավելելով, որ մարզպետարանների «օպտիմալացման գործընթացը» նախաձեռնել է դեռևս հոկտեմբեր ամսից:

«Մի քանի մարզպետարաններում ուսումնասիրություն ենք կատարել և եկել ենք այն եզրահանգման, որ մարզպետարանների աշխատակիցների մոտ 30%-ը կկրճատվի»,- ասել է նա, հայտնում է Panorama.am-ը:

Ըստ նրա՝ այդ աշխատանքներում ներգրավել են խորհրդատվական ընկերություն, որի ֆինանսավորումն իրականացնում է Շվեցարիայի զարգացման գործակալությունը:

Սուրեն Պապիկյանի խոսքով՝ արդեն իսկ սխեման կա. մի քանի դետալների շտկումից, նաև՝ կառավարության կառուցվածքային վերջնական փոփոխություններից հետո, հաջորդ քայլը կլինեն մարզպետարանները:

Անդրադառնալով այն հարցին, թե ինչ սկզբունքով են կրճատումներն արվելու, որպեսզի լավ աշխատակիցները դրսում չհայտնվեն՝ նախարարն ասել է, որ մրցույթ են անցկացնելու և արդյունքում կմնան լավ աշխատողները: «Այս օպտիմալացումները մեկ նպատակ են հետապնդում՝ արդյունավետ կառավարում և ավելի որակյալ մասնագետների ներգրավում»,-ասել է նա:

Օպտիմալացում է իրականացվել կառավարության կազմում, 17 գործող նախարարություններից 5 կրճատվել է: Նոր կառավարությունում 12 նախարարություն կա:

Հղումներ թեմայով.

panorama.am. Մարզպետարանների աշխատակիցների մոտ 30 տոկոսը կկրճատվի. Պապիկյան