Վանեցյան. Քոչարյանը նաև շատ դրական գործեր է արել

Վանեցյան. Քոչարյանը նաև շատ դրական գործեր է արել

PanARMENIAN.Net - ԱԱԾ տնօրեն Արթուր Վանեցյանն, անդրադառնալով ՀՀ երկրորդ նախագահ Ռոբերտ Քոչարյանի որդու՝ Սեդրակ Քոչարյանի կողմից իրեն դատի տալուն, հայտարարել է, որ դատի տալը ցանկացած քաղաքացու սահմանադրական իրավունքն է:

Նա շեշտել է, որ անմեղության կանխավարկած չի խախտվել։«Քոչարյանների ընտանիքը որևէ բան չի արել անձամբ ինձ, որ նրանց հետ կապված խոսվում է։ Ռոբերտ Քոչարյանը եղել է ՀՀ երկրորդ նախագահը, ունեցել է իր գործունեության ընթացքում նաև շատ դրական գործեր, եղել է Արցախի առաջին նախագահը, ու ես, որպես սպա, չեմ կարող որևէ անձնական կամ այլ բաներով խնդիրներ ունենամ այդ ընտանիքի հետ», - ասել է ԱԱԾ տնօրենը, հայտնում է Aysor.am-ը։

Արթուր Վանեցյանը նշել է, որ պետք չէ անձնավորել այս հարցը։ «Սեդրակ Քոչարյանը կարող է դատի տալ և դատարանը կորոշի՝ մեղավոր ենք, թե մեղավոր չենք», - ասել է նա։

Արթուր Վանեցյանը պնդել է՝ քաղաքական հետապնդման որևէ հարց չկա։«Առհասարակ, մենք ընդհանրապես չէինք ուզում որևէ հաղորդագրություն տարածեինք, նախաձեռնությունը եղավ իրենց կողմից», - նշել է ԱԱԾ տնօրենը։

Արթուր Վանեցյանի խոսքով՝ քաղհայցը, որը ներկայացվել է իր դեմ, եղել է հայտնի մամուլի ասուլիսին արած արտահայտության համար։ «Ես ասուլիսից անմիջապես հետո ասել եմ, որ իմ խոսքը եղել է ոչ ճիշտ ձևակերպված, որի համար պարզաբանում եմ տվել, ինչի համար դիմել են դատարան, ի սկզբանե ես հերքել եմ», - ասել է նա։

Այն հարցին, թե երբ ասում էր Քոչարյանների ընտանիք, նկատի ունե՞ր Սեդրակ Քոչարյանին, Վանեցյանը պատասխանել է. «Քոչարյանի ընտանիք ասելով՝ նկատի ունենք Քոչարյանների ընտանիքի բոլոր անդամները»: Նա հավելել է, որ Քոչարյանների ընտանիքի դեմ որևէ անձնական խնդիր չունի։

ՀՀ երկրորդ նախագահ Ռոբերտ Քոչարյանի որդին՝ Սեդրակ Քոչարյանը, պատրաստվում է դատի տալ ԱԱԾ տնօրենին անմեղության կանխավարկածի կոպիտ խախտման կապակցությամբ: Դա կլինի նրա 2-րդ հայցադիմումը Վանեցյանի դեմ:

2018-ի սեպտեմբերին Սեդրակ Քոչարյանը հայցադիմում է ներկայացրել ընդդեմ Արթուր Վանեցյանի` զրպարտության դիմաց փոխհատուցում ստանալու և հրապարակայնորեն հերքելու պահանջի մասին։ ԱԱԾ տնօրենը սեպտեմբերի 11-ի ասուլիսում Ռոբերտ Քոչարյանի վերաբերյալ արած որոշ հայտարարություններ հետագայում խմբագրեց և ասաց, որի արագ խոսելու հետևանք են․ «Մամուլի ասուլիսի ժամանակ ես հայտարարեցի վեց միլիոն կաշառքի մասին: Դա մի քիչ արագ խոսելու արդյունք էր ․․․»։

 Ուշագրավ
Ծանուցումների պաշտոնական կայքում ծանուցագրի քաղվածքը տեղադրելու 10-րդ օրը քաղաքացին համարվում է պատշաճ ծանուցված
Նա նաև վստահություն է հայտնել, որ որևէ ՔՊ-ական չի գնա հանդիպման սրբազանի հետ
Իրանի նախագահի և նրան ուղեկցող անձանց հուղարկավորությունը տեղի կունենա մայիսի 21–ին
---