Թորոսյան․ «Իմ քայլի» որոշ պատգամավորներ չեն ուզում դրական փոփոխություններ առողջապահությունում

PanARMENIAN.Net - ՀՀ առողջապահության նախարար Արսեն Թորոսյանը ֆեյսբուքյան իր էջում գրել է, թե տպավորություն է, որ «Իմ քայլը» խմբակցության որոշ պատգամավորներ դրական փոփոխություններ չեն ուզում ՀՀ-ի առողջապահական համակարգում:

«Քիչ առաջ ստացա մի զանգ, որը ստիպեց ինձ գրառում կատարել այստեղ։ Ինձ մոտ գնալով արմատանում է այն տպավորությունը, որ մեր խմբակցության որոշ պատգամավորներ դրական փոփոխություններ չեն ուզում ՀՀ-ի առողջապահական համակարգում։ Կարծես թե Հայաստանում թավշյա հեղափոխությունից հետո ամեն ինչ պետք է մնար նույնը՝ պետական թալանված փողերը չպետք է վերադարձվեին, քանի որ դա «գործ տալ է», գլխուղեղի իշեմիկ կաթվածի ծրագիրը չպետք է ներդրվեր, քանի որ որոշ բուժհիմնարկներ զարգացած չեն այնքան, որ կարողանան դա իրականացնել, սանիտարական ավիացիան չպետք է գործի Հայաստանում, քանի որ իրենք ոչ մի գրամ ներդրում չեն ունեցել դրա կայացման մեջ և այլն», - գրել է նախարարը:

Նա հավելել է, որ օգնություն չի ակնկալում նրանցից, բայց և թույլ չի տա որևէ արհեստական խոչընդոտ այդ կարևոր ծրագրերի իրականացման ընթացքում և «չի վարանի իրերը կոչել իրենց անուններով»:

«Մի բան բոլորի համար թող պարզ լինի. ես այս պատասխանատու գործում ունեմ գեթ մեկ առաքելություն՝ բերել դրական փոփոխություններ մեր երկրի առողջապահական համակարգում և բնակչության առողջության մեջ։ Այլ շահեր, ի տարբերություն ոմանց, ոչ ունեցել եմ, ոչ էլ ունեմ», - գրել է նախարարը:

Ավելի վաղ խմբակցության մի շարք պատգամավորներ մտահոգություն են հայտնել գազավորված ընպելիքներն ակցիզային հարկով հարկելու և ծխախոտի գները մի քանի անգամ թանկացնելու կառավարության մատադրության վերաբերյալ՝ պատճառաբանելով, որ այդ որոշումները կարող են տնտեսական բացասական էֆեկտ ունենալ: