Ջավադյան. Ըստ նախնական կանխատեսումների՝ 2019թ. տնտեսական աճը կլինի 4,6 – 6,1%ի միջակայքում

3 հունիսի 2019 - 17:21 AMT

PanARMENIAN.Net - 2019թ. տնտեսական աճը, ըստ նախնական կանխատեսումների, կգտնվի 4,6-6,1%միջակայքում, որին հիմնականում նպաստելու է մասնավոր սպառումը: Այդ մասին հայտարարել է ՀՀ Կենտրոնական բանկի նախագահ Արթուր Ջավադյանը, որը խորհրդարանում հանդես է եկել «ՀՀ կենտրոնական բանկի գործունեության վերաբերյալ տարեկան հաղորդման» զեկույցով:

Ջավադյանը հայտնել է, որ հաղորդումը հաստատվել է մարտի 12-ին, հիմնական դրույթները եղել են փետրվար ամսի հետազոտությունների ու մակրոիրավիճակի հիման վրա: Նա նշել է, որ մասնավոր սպառման բարձր աճին հիմնականում նպաստելու է բիզնեսին տրված վարկերի աճի համեմատ տնային տնտեսություններին տրված վարկերի առաջանցիկ աճի տեմպը, հայտնում է shantnews.am-ը:

ԿԲ նախագահը տեղեկացրել է, որ տնտեսական աճի պահանջարկի վրա արտահանման ու հարկաբյուջետային քաղաքականության ազդեցությունը տարվա ընթացքում կլինի որոշակի զսպող՝ պայմանավորված արտահանմանը զուգահեռ նաև ներմուծման աճի տեմպերով և պետական բյուջեի պակասուրդի կրճատմամբ:

2019 թվականի հունվար- ապրիլ ամիսներին 2018 թվականի նույն ժամանակահատվածի համեմատ ՀՀ-ում տնտեսական ակտիվության ցուցանիշն աճել է 7%-ով:Ազգային վիճակագրական ծառայության տվյալների համաձայն՝ հաշվետու ժամանակահատվածում արդյունաբերական արտադրանքի ծավալն աճել է 4.5%-ով, շինարարության ծավալը՝ 8%-ով, առևտրի շրջանառությունը՝ 9.8%-ով, ծառայությունների ծավալը՝ 17%-ով:

Հղումներ թեմայով.

shantnews.am. 2019թ. տնտեսական աճը նախնական կանխատեսումներով կլինի 4,6-6,1 տոկոս միջակայքում. ԿԲ նախագահ