Թուրքիայի բոլոր ԶԼՄ-ների համար, ներառյալ հայկականները, գոյություն ունեն որոշակի սահմանափակումներ: Այդ մասին Երեւանում կայացած մամլո ասուլիսի ժամանակ հայտարարել է Ստամբուլում լույս տեսնող հայկական «Ժամանակ» օրաթերթի գլխավոր խմբագիր Արա Քոչունյանը: «Օրինակ, մենք մեր թերթում չենք օգտագործում Հայոց ցեղասպանություն տերմինը ոչ այն պատճառով, որ ժխտում ենք այդ փաստը: Ուղղակի Թուրքիայում շատ ցավագին են ընկալում այդ հարցը եւ նրանից, թե մենք ինչ կգրենք, ոչինչ չի փոխվի: Մեր թերթը ուժերի ներածին չափով փորձում է հանրությանը ներկայացնել 1915թ. իրադարձությունների տարբեր վարկածներ: Թե ինչ եզրակացություններ կանի դրանից ընթերցողը, դա նրա գործն է»,-ասել է Քոչունյանը: Միեւնույն ժամանակ նա նշել է, որ այս հարցում տերմինաբանությունը երկրորդական դեր է խաղում: «Ստամբուլի հայ համայնքը չափազանց բարդ պայմաններում է գտնվում: Մի կողմից մենք Թուրքիայի քաղաքացիներ ենք, մյուս կողմից` 1915 թ. իրադարձությունների զոհերի սերունդները, երբ Ստամբուլի 200-հազարանոց հայ համայնքից մնացին մի քանի տասնյակ հազարը: Մենք ստիպված ենք անընդհատ հիշել այդ մասին»,-ասել է Քոչունյանը` հավելելով, որ Թուրքիայում յուրաքանչյուր խմբագիր իր «ներքին գրաքննադատն» ունի:

«Ժամանակ» թերթը հիմնվել է 1908թ եւ հանդիսանում է սփյուռքի հայալեզու փոքրաթիվ օրաթերթերից մեկը: