Երկրաշարժից տուժածների բնակարանային խնդիրը լուծելու համար 3 մլրդ դրամ կհատկացվի

11 հուլիսի 2019 - 15:03 AMT

PanARMENIAN.Net - ՀՀ կառավարությունը մտադիր է մեկ ծրագրի շրջանակում լուծել Սպիտակի ավերիչ երկրաշարժից տուժածների բնակարանային խնդիրը: Այդ մասին հինգշաբթի կառավարության նիստից առաջ հայտնել է վարչապետ Նիկոլ Փաշինյանը:

Ավելի վաղ Քաղաքաշինության կոմիտեի նախագահ Վահագն Վերմիշյանը հայտնել էր, որ 2020 թ.-ին նախատեսվում է լուծել վերջին 453 ընտանիքի բնակարանային հարցը, հայտնում է «Նովոստի-Արմենիան»:

«Մենք կլուծենք քաղաքացիների բնակարանային խնդիրը, որոնց նկատմամբ դե յուրե ամրագրված են պետության պարտականությունները: Այդ նպաակով կհատկացվի 3 մլրդ դրամ (մոտ 6,2 մլն դոլար)», - ասել է Փաշինյանը: Ըստ նրա, խնդրի լուծման մեթոդաբանությունը կհաստատվի հետագա քննարկումների ժամանակ:

Ավելի վաղ ՀՀ Քաղաքաշինության կոմիտեի նախագահ Վահագն Վերմիշյանը հայտարարել էր. «1988-ի երկրաշարժից տուժած 5396 ընտանիք բնակարանային խնդիրները պետք է լուծվեին 2008-2020 թվականներին։ «2008-2017-ին 4839 շահառուի բնակարանային խնդիրը լուծվել է, ծախսվել է 65 միլիարդ դրամ։ 2018-ին բյուջեից հատկացվել է 460 միլիոն դրամ, բնակարանով ապահովվել է 44 ընտանիք։ 2019-ին բյուջեից 560 միլիոն դրամ է նախատեսված Շիրակի, Լոռու, Արագածոտնի մարզերի գյուղերի 60 ընտանիքի համար»:

Հղումներ թեմայով.

newsarmenia.am. Կառավարությունը 6,2 մլն դոլար կհատկացնի Սպիտակի երկրաշարժի տուժածների բնակարանային հարցը լուծելու համար