Աջափնյակում մետրոյի կայարան կառուցելու համար ներդրողի համաձայնություն կա

PanARMENIAN.Net - Աջափնյակում մետրոպոլիտենի կայարանի կառուցման վերաբերյալ Երևանի քաղաքապետարանն ու մասնավոր ներդրողը նախնական համաձայնություն են ձեռք բերել: Այս մասին, «Հետքի» հաղորդմամբ, ԱԺ-ում լրագրողների հետ զրույցում ասել է Երևանի փոխքաղաքապետ Հայկ Սարգսյանը:

«Ներդրող կողմի հետ նախնական համաձայնություն ունենք, որ ֆինանսավորի հենց սկսված նախագծային փուլից` նախագիծը, նախահաշիվը կազմելու համար և հետագայում քննարկվի դրա արդյունքում ձևավորված գնի շրջանակներում մետրոյի կայարանի շինարարության հարցը»,- նշել է փոխքաղաքապետը` հավելելով, որ առաջարկվում է բիզնես մոդել, համաձայն որի մետրոյի վերջնակետում մոլ կամ բիզնես կենտրոն կառուցվի:

Սարգսյանի խոսքով` վերջերս Երևան են եկել ներդրողի կողմից ներգրավված շինարարները, որոնք ուսումնասիրություն են կատարել թե Հրազդանի կիրճի, թե թունելի հատվածում` հասկանալու ծրագրի նախնական իրագործելիությունը:

«Իրենց հետ վերջնական պայմանավորվածություն ունեցանք, որ կիրականացվի նախագիծը, կքննարկվի բիզնես մոդելը, որն իրենք կկառուցեն, կներկայացնեն՝ մեր տված պարամետերի հիման վրա, և կիրականացվի մետրոպոլիտենի շինարարարությունը»,-ասել է Սարգսյանը` հույս հայտնելով, որ գարնանից որոշակի աշխատանքներ կմեկնարկեն:

Փոխքաղաքապետը նաև նշել է, որ ներդրողի հետ քննարկվող նախագծում կայարանը կլինի կամրջի վրա՝ ժամանակակից կոնստրուկցիաներով զինված, որը հնարավորություն կտա շարունակելիությունն ապահովել մինչև հաջորդ կայարան:

Հոկտեմբերի 29-ին Երևանի քաղաքապետի մամուլի խոսնակ Հակոբ Կարապետյանը, «Հայկական ժամանակի» հետ զրույցում ներկայացրել էր մետրոյի նոր կայարանի էսքիզները՝ նշելով, որ Մասնավոր ներդրումների հաշվին իրականացվելու է նաև Երևանի մետրոպոլիտենի ընդհանուր զարգացման ծրագիրը: 2019-ի սկզբին Երևանի գլխավոր ճարտարապետ Արթուր Մեսչյանը հայտնել էր Աջափնյակում մետրոյի երկու նոր կայարան կառուցելու մասին: