Սենատոր Գրեմն արգելափակել է Ցեղասպանության մասին բանաձևը Սպիտակ տան պաշտոնյայի պահանջով

Սենատոր Գրեմն արգելափակել է Ցեղասպանության մասին բանաձևը Սպիտակ տան պաշտոնյայի պահանջով

PanARMENIAN.Net - ԱՄՆ Կոնգրեսի հանրապետական սենատոր Լինդսի Գրեմն արգելափակել է Հայոց ցեղասպանությունը ճանաչող բանաձևը Սպիտակ տան բարձրաստիճան պաշտոնյայի պահանջով, հայտնում է Axios-ը:

Գրեմի այդ արարքը շատերին էր վրդովեցրել ու զարմացրել, երբ Գրեմը շտապեց վերադառնալ Սենատի հարկ ու արգելափակեց բանաձևը: Գրեմը հենց նոր էր քննադատել Թուրքիայի նախագահ Ռեջեփ Թայիփ Էրդողանին Սիրիա ներխուժելու և քրդերին գրոհելու համար, ըստ իրազեկ աղբյուրի:

Երբ Գրեմը դուրս էր գալիս Օվալաձև աշխատասենյակից, Սպիտակ տան բարձրաստիճան աշխատակիցը, ըստ հաղորդագրությունների, խնդրել էր նրան վերադառնալ Սենատ և արգելափակել Հայոց ցեղասպանության մասին բանաձևը, որն առաջացրել էր Էրդողանի ցասումը: Ինքը Գրեմը ևս հաստատել էր այդ տեղեկությունը:

«Հանդիպումից հետո մենք խմբվել էինք և խոսում էինք այն մասին, թե ինչ տեղի ունեցավ»,-ասելէ նա: Սպիտակ տան օրենսդրական հարցերի գծով աշխատակիցը ասել է Գրեմին, որ սենատոր Բոբ Մենենդեսը մտադիր է բարձրացնել Հայոց ցեղասպանության մասին բանաձևի հարցը և չի կարող արդյոք Գրեմն «առարկել»: «Ես ասացի՝ իհարկե»,-ասել է Գրեմը: «Միակ պատճառը, թե ինչու ես դա արեցի, այն էր, որ Էրդողանը դեռևս քաղաքում էր...Դրա ժամանակը չէր: Ես փորձեցի փրկել մեր հարաբերությունները»,-ասել է Գրեմը:

Այն հարցին, թե արդյոք ինքն անհարմար է զգում, Հայոց ցեղասպանության մասին բանաձևն արգելափակելու համար, Գրեմը դրական է պատասխանել: «Հաջորդ անգամ չեմ առարկի»,-ասել է նա:

Մինչդեռ, սենատորներ Մենենդեսն ու Թեդ Քրուզը կրկին ներկայացրեցին Հայոց ցեղասպանության մասին բանաձևը, որն այս անգամ արգելափակեց մեկ այլ սենատոր՝ Դևիդ Փերդյուն:

Հոկտեմբերի 29-ին ԱՄՆ Կոնգրեսի Ներկայացուցիչների պալատն ընդունել է Հայոց ցեղասպանությունը ճանաչող բանաձևը։ Թիվ 296 բանաձևն ընդունվել է 405 «կողմ» և 11 «դեմ» ձայներով։

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը:

 Ուշագրավ
Նա նաև ասել է, որ տարածաշրջանային անվտանգությունը պետք է ապահովեն տարածաշրջանի երկրները
Նա հավելել է, որ թուրքական կողմն ավարտել է Նախիջևանի և Կարսի միջև 224 կմ երկարությամբ երկաթուղային գծի կառուցումը
Փետրվարի 1–ից ՀՀ–ն պաշտոնապես միացել է Հաագայի Միջազգային քրեական դատարանին
Փետրվարի 1-ին Միջազգային քրեական դատարանը իրավասություն է ստանալու հետաքննել Ալիևի գործողությունները
---