Ծառուկյան-Մարության հերթական «ռաունդի» մասին

PanARMENIAN.Net - «Բարգավաճ Հայաստան» կուսակցության ղեկավար Գագիկ Ծառուկյանը հորդորել է քաղաքապետ Հայկ Մարությանին քաղաքապետարանի շենքը չշփոթել թատրոնի շենքի հետ: Ծառուկյանն ասել է նաև, որ քաղաքապետը պետք է 2 տարի առաջվա քարոզչական հոլովակները նայի և կատարի տված խոստումները, հաղորդում է Factor.am-ը: ԲՀԿ առաջնորդը նաև ցույց է տվել թղթեր՝ ասելով, որ Երևանի կենտրոնում կառուցվող հյուրանոցի համար իրականում տրված է 11 հարկի կառուցման թույլտվություն, ոչ թե 1:

«Թող դատարկ-դատարկ չխոսեն, թող աէրոպորտում նայեն՝ ապրիլի 26-ին, շեյխն իր ինքնաթիռով, 18 հոգով եկել է Հայաստան»,-ասել է Ծառուկյանը՝ անդրադառնալով ներդրողի՝ Աբու Դաբիի թագաժառանգ չլինելու մասին քննարկումներին:

Քաղաքապետի մամուլի խոսնակ Հակոբ Կարապետյանը Ծառուկյանի այս հայտարարությունից հետո ֆեյսբուքյան իր էջում գրառում է արել՝ անդրադառնալով ապօրինի շինարարության հարցին:

«Բարգավաճ Հայաստան կուսակցության լիդեր Գագիկ Ծառուկյանը Ազգային Ժողովում թղթեր է ցույց տալիս՝ փորձելով ապացուցել, թե ապօրինի շինարարություն չի արել։ Պարոն Ծառուկյանը սրանով բացահայտում է, որ նախագծային առաջադրանքի ու շինթույլտվության միջև տարբերությունը չգիտի»,- գրել է Կարապետյանը։

Դեկտեմբերի 3-ին քաղաքապետ Հայկ Մարությանը Հանրային հեռուստաընկերության եթերում հայտնել էր, որ Երևանի կենտրոնում հիվանդանոց և հյուրանոց կառուցելու առաջարկ անող ներդրողների ցանկությունն իրականանալ չի կարող ոչ թե քաղաքապետարանի խոչընդոտների, այլ մայրաքաղաքի գերբեռնված կենտրոնի պատճառով:

Ավելի վաղ Ծառուկյանն ասել էր, որ Աբու Դաբիի թագաժառանգը ցանկացել է Երևանում հիմնել կարիքավոր անձանց անվճար սպասարկող հիվանդանոց, իսկ Արաբական Միացյալ Էմիրությունների «Ռոտանա» հյուրանոցային ցանցի սեփականատերը՝ 2 հյուրանոց, բայց Երևանի քաղաքապետ Հայկ Մարությանի և Գլխավոր ճարտարապետ Արթուր Մեսչյանի հետ հանդիպումը հաջող չի անցել, ներդրողները հիասթափվել են:

«Հիվանդանոցը, որ պետք է բարեգործական լինի, բացարձակ այդպիսի խոսակցություն չկար, զուտ՝ բիզնես և հյուրանոց: Շեշտը դրվում էր Կենտրոնի վրա, մենք ասացինք, որ կենտրոնը գերծանրաբեռնված է: Քաղաքը չունի իր հողատարածքները Կենտրոնում, այն պարզ պատճառով, որ բոլոր տարածքները խարխլված են»,- ասել է Մարությանը՝ հավելելով, որ պոտենցիալ ներդրողներին իրենք ասել են, որ ամեն ինչ կանեն աջակցելու համար :

Մարությանը նշել է, որ պաշտոնական հանդիպման ընթացքում հյուրերը զանգերի են պատասխանել, ինքն էլ առաջարկել է դիմումների, առաջարկներ ներկայացնել՝ քաղաքի այլ հատվածներում կառուցապատում իրականացնելու համար: Քաղաքապետն անդրադարձել է նաև ԲՀԿ առաջնորդի այն հայտարարությանը, որ խոչընդոտվում է Երևանում մեծ հյուրանոցի կառուցումը:

«Պարոն Ծառուկյան, Դուք չեք տիրապետում ինֆորմացիային: Ձեր շինարարությունը կասեցվել է, քանի որ հարևանը դիմել է դատարան և դատարանը որպես հայցի ապահովման միջոց կասեցրել է շինարարությունը»,-ասել է քաղաքապետը՝ հավելելով, որ այդ շինության 2 հարկն ապօրինի է:

Սոցցանցերում քննարկման ժամանակ օգտատերերը կասկած էին հայտնել, թե պոտենցիալ ներդրողներն արդյոք իսկապես Աբու Դաբիի թագաժառանգն է, թե ոչ: Նշվում է, որ նույն մարդիկ ներկա են եղել նաև Ծառուկյանին պատկանող ավտոսրահի բացմանը և ներկայացվել են որպես արաբական ավտոսրահներից մեկի տնօրեն ու սեփականատեր։