ԵԽԽՎ. ՀՀ վարչապետի և ՍԴ նախագահի միջև լարվածությունը հասել է աննախադեպ մակարդակի 1 փետրվարի 2020 - 10:28 AMT PanARMENIAN.Net - Եվրոպայի խորհրդի խորհրդարանական վեհաժողովում (ԵԽԽՎ) Հայաստանի հարցով համազեկուցողներ Անդրեյ Շիրցելն (Սլովենիա) ու Կիմմո Կիլյունենը (Ֆինլանդիա) անհանգստություն են հայտնել Հայաստանում երկու պետական ինստիտուտների՝ վարչապետի գրասենյակի և Սահմանադրական դատարանի նախագահության միջև լարվածության աննախադեպ մակարդակի պատճառով։ «Հավասարակշռումն անհրաժեշտ է ցանկացած ժողովրդավարական համակարգում: Սա ենթադրում է, որ բոլոր ինստիտուցիոնալ ուժերը պետք է գործեն ըստ օրենքի գերակայության և հարգեն այն իրենց գործերով և խոսքերով՝ ներառյալ անմեղության կանխավարկածի սկզբունքի հետ կապված: Եթե նրանք չկարողանան գործակցել այս սկզբունքների համաձայն, ապա նրանք խարխլում ու վնասում են միմյանց: Ուստի` անհանգստացած ենք այն երկարաժամկետ վնասներով, որ այս լարվածությունը, որն հասել է աննախադեպ մակարդակի, կարող է պատճառել ամբողջ դատական համակարգին, որի նկատմամբ վստահությունն արդեն շատ ցածր է», - ասվում է հայտարարության մեջ, մեջբերում է Panorama.am-ը: Նշվում է, որ մինչ այժմ Կառավարությունն ու խորհրդարանը հարգել են իրավիճակը կարգավորելու իրավական ընթացակարգերը: Ավելին` իշխանությունները հայցել են Վենետիկի հանձնաժողովի կարծիքը՝ Սահմանադրական դատարանի դատավորների վաղաժամ կենսաթոշակի անցնելու մեխանիզմի վերաբերյալ: «Համաձայն եվրոպական ստանդարտների՝ Վենետիկի հանձնաժողովն ընդգծել է, որ վաղաժամ կենսաթոշակի անցնելը պետք է լինի խիստ կամավոր, և որ այդ սկզբունքը պետք է պահպանվի: Որպես համազեկուցողներ` ուշադիր հետևելու ենք, որ ՀՀ իշխանությունները շարունակեն գործել այս վերոնշյալ ձևով, նույնիսկ եթե այս մեխանիզմի նպատակը, այն է՝ պահպանել 2015-ի սահմանադրական փոփոխությունների ոգին, հիմնավոր ճիշտ է», - հավելել են համազեկուցողները: Նրանք նաև նշել են` «արդեն շեշտել են, որ քաղաքական խաղացողները պետք է զերծ մնան գործողություններից և հայտարարություններից, որոնք կարող են ընկալվել որպես դատական համակարգի վրա ճնշման գործադրում: «Ի հավելումն, մենք կոչ ենք անում բոլոր կողմերին նվազեցնել լարվածությունը։ Վերջապես, այդ լարվածությունը չպետք է ստվերի Հայաստանում իրականացվող բարեփոխումների անհրաժեշտությունը` լինեն դրանք նախապատրաստական փուլում գտնվող, թե արդեն մեկնարկած՝ Եվրոպայի խորհրդի համար հետաքրքրություն ներկայացնող շատ ոլորտներում», - եզրափակել են համազեկուցողները։ Սահմանադրական դատարանի նախագահ Հրայր Թովմասյանի փաստաբանական խմբի անդամ Միհրան Պողոսյանը դիմել է ՀՔԾ, հունվարի 29-ին՝ Հանրային հեռուստաընկերության «Լուրեր»-ի թողարկման ընթացքում եթեր հեռարձակված ռեպորտաժի դեպքով: Վարչապետ Նիկոլ Փաշինյանը ֆեյսբուքյան իր էջում տեղադրել էր այն՝ նշելով, որ Թովմասյանը չի կարող լինել Սահմանադրական դատարանի նախագահ և որևէ կապ ունենալ ՍԴ-ի հետ: «Լուրերի» ռեպորտաժում ներկայացվում էին Թովմասյանին առաջադրված 2 մեղադրանքի մանրամասները: ՍԴ նախագահի փաստաբանական թիմն այն անվանել էր քրգործում եղած «ապացույցների» ակնհայտ կանխակալ ներկայացման և անմեղության կանխավարկածի «ցինիկ խախտման ցայտուն օրինակ»։ Դեկտեմբերի 27-ին ՀՔԾ-ն Թովմասյանին մեղադրանք էր առաջադրել Քրեական օրենսգրքի 308-րդ հոդվածի երկրորդ մասի հատկանիշներով՝ «պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ»։ Նրա նկատմամաբ որպես խափանման միջոց էր ընտրվել չհեռանալու մասին ստորագրությունը: Ուշագրավ Այս գերեզմանատանն են ամփոփված այնպիսի նշանավոր հայերի մարմինները, ինչպիսինք են Վիլյամ Սարոյանն ու Սողոմոն Թեհլերյանը
«Կշարունակենք այն վնասի հատուցման ուղիների քննարկումը, որը հասցնում է այդ աննախադեպ ճնշումը»,–ասել է նա ՀՀ և Ադրբեջանի միջև խաղաղ բանակցություններին և կարգավորմանը վերաբերող հարցերը չեն քննարկվելու «Այն անպայման կցուցադրվի, սակայն պարզ չէ, թե երբ»,–ասել է Սեիդովը Ամենաընթերցվողը բաժնում | Կայծակը հարվածել է Աբու Դաբի-Երևան չվերթի օդանավին՝ ճաքել է պատուհաններից մեկը Օդանավում խուճապ է սկսվել, սակայն օդաչուների պրոֆեսիոնալիզմի շնորհիվ հաջողվել է անվնաս վայրէջք կատարել Fastex-ը, Ucraft-ը և Hoory-ն հովանավորել են Dօing Digital 2024 համաժողովը և հատուկ մրցանակների արժանացել Fastex web3 էկոհամակարգը ճանաչվել է լավագույնը բլոկչեյնի նորարարական կիրառման համատեքստում GRECO-ն ՀՀ-ին կոչ է արել ավելի ուժեղ վերահսկողություն սահմանել բարձրագույն գործադիր գործառույթների նկատմամբ Իշխանությունները GRECO-ին պետք է ներկայացնեն զեկույցում առկա 22 առաջարկությունների վերաբերյալ իրենց կատարողականը ՀՀ ԱԳՆ․ Ադրբեջանական լրատվամիջոցներում հրապարակված թուղթը կեղծ է՝ Բրյուսելի հանդիպմանը գաղտնի օրակարգ չի եղել Նա հավելել է, որ բրյուսելյան գործընթացն ամբողջովին թափանցիկ է եղել և շարունակելու է մնալ այդպիսին |