Փետրվարի 1-ին ՀՀ մի խումբ քաղաքացիների գրանցումը Ural Airlines-ի տոմսերով մերժվել է, չվերթի ավիատոմսերը փոխհատուցվել են:
ՀՀ ԱԳՆ-ն արձագանքել է՝ նշելով, որ այդ երկրում ՀՀ դեսպանությունը խորհուրդ է տալիս մոտակա քաղաք մեկնել, որտեղից հնարավոր կլինի այլ ավիաուղիներով թռչել Հայաստան՝ նախօրոք ճշտելով տվյալ ավիաընկերության կարգավորումները:
Հաշվի առնելով Չինաստանում կորոնավիրուսի տարածման հետ կապված իրավիճակը՝ մի շարք միջազգային ավիաընկերություններ աստիճանաբար սահմանափակում են չվերթները Պեկինից և Չինաստանի այլ քաղաքներից։
ՀՀ և Ղազախստանի ԱԳՆ-ների գործակցության արդյունքում փետրվարի 2-ին Չինաստանի Ուհան քաղաքում գտնվող և տարհանման ցանկություն հայտնած ՀՀ քաղաքացի Սուսաննա Աղաջանյանը տեղափոխվել է Ղազախստան. քայլեր են ձեռնարկվում նրան ՀՀ վերադարձնելու ուղղությամբ:
Ըստ ՀՀ ԱԳՆ-ի՝ Չինաստանում գտնվող քաղաքացիներին՝ օդակայան մեկնելուց առաջ անհրաժեշտ է նախօրորք կապվել տվյալ ավիաընկերության հետ՝ ճշտելու թռիչքի մանրամասները։
Չինաստանում ՀՀ դեսպանությունն ու ԱԳՆ-ն քայլեր են ձեռնարկում նման զարգացումները կանխելու ուղղությամբ, իսկ դեսպանությունը կապի մեջ է իրենց մասին հայտնած բոլոր ՀՀ քաղաքացիների հետ և արձագանքում է բոլոր հարցադրումներին:
Չինաստանում և աշխարհի 124 երկրում տարածված նոր կորոնավիրուսով վարակվել է մոտ 12,000 մարդ: Չինաստանի իշխանությունները պաշտոնապես հաստատել են, որ վիրուսը փոխանցվում է մարդուց մարդուն։ Բժիշկների խոսքով` կորոնավիրուսի հիմնական ախտանիշներն են ջերմությունը, հոգնածությունն ու չոր հազը։
Փետրվարի 1-ից մինչ մարտի 31-ը Չինաստանի քաղաքացիների համար Հայաստանի մուտքի վիզայի ազատ ռեժիմը ժամանակավորապես կասեցվել է։