Իտալիայից ՌԴ վերադարձած ռուսաստանցու մոտ կորոնավիրուս կա

PanARMENIAN.Net - Իտալիայից վերադարձած ռուսաստանցու մոտ կորոնավիրուս է հաստատվել: Պարզվել է, որ երիտասարդը հիվանդացել է փետրվարի 21-ին, երբ հանգստի նպատակով գտնվում էր Իտալիայում, գրում է Interfax-ը:

Նա վերադարձել է Իտալիայից փետրվարի 23-ին, իսկ բժշկի է դիմել փետրվարի 27-ին սուր շնչառական հիվանդության ախտանշաններով: Պոլիկլինիկայից հիվանդը հոսպիտալացվել է ինֆեկցիոն հիվանդանոց: Պացիենտը մեկուսացվել է, իսկ մարդիկ, ում հետ նա շփում է ունեցել, բժշկական հսկողության տակ են, ասել են օպերատիվ շտաբում:

Հիվանդի վիճակը բավարար է, հիվանդության ընթացքը գնահատվում է թեթև:

Մարտի 2-ի տվյալներով՝ նոր կորոնավիրուսով վարակվածների թիվն աշխարհում գերազանցել է 89,000-ը, իսկ մահացածներինը՝ 3000-ը: Հայաստանում գրանցվել է կորոնավիրուսի մեկ դեպք՝ Իրանից եկած ՀՀ քաղաքացու մոտ: Նա ինֆեկցիոն հիվանդանոցում է: Իրանից վերադարձած ևս 31 քաղաքացի գտնվում են կարանտինում՝ Ծաղկաձորի «Գոլդեն Փելես» հյուրանոցում: