ԱՀԿ․ Սահմանափակումների արագ չեղարկումը կարող է մեծացնել վարակի ծավալներն ու վնասել տնտեսությանը

PanARMENIAN.Net - Կորոնավիրուսի հետ կապված սահմանափակումներն արագ վերացնելու պետությունների որոշումները կարող են հանգեցնել համաճարակի աճի և տնտեսական լուրջ կորուստների, հայտարարել է Առողջապահության համաշխարհային կազմակերպության ղեկավար Թեդրոս Ադհանոմ Հեբրեյեսուսը, փոխանցում է ՏԱՍՍ-ը։

Նա նշել է, որ պետությունների նման վարքագիծը տնտեսական ճգնաժամը կարող է ավելի լրջացնել և երկարատև դարձնել։

ԱՀԿ ղեկավարն ասել է, որ սահմանափակումները վերացնելու կամ թեթևացնելու լավագույն տարբերակը վիրուսի դեմ պայքարելն է՝ ագրեսիվ և ընդգրկուն միջոցներով։ Նա անհրաժեշտ է համարել յուրաքանչյուր դեպքով վարակի հայտնաբերումը, թեստավորումը, իզոլացումը։

Ըստ Հեբրեյեսուսի՝ անհրաժեշտ է մեղմացնել ֆինանսական պարտավորվածություն ունեցող պետությունների բեռը՝ հնարավորություն տալով նրանց միջոցներն ուղղել վարակի դեմ պայքարին։

Աշխարհում կորոնավիրուսի պանդեմիա է։ Ըստ միջազգային հետազոտական ինստիտուտների տվյալների աշխարհում կորոնավիրուսով վարակված է մոտ 1․1 մլն մարդ։ ԱՄՆ-ն վարակակիրների թվով աշխարհում առաջատարն է, այնտեղ 278,000-ից ավելի մարդ վարակված է։ Ըստ պաշտոնական տվյալների՝ Իսպանիան երկրորդն է վարակակիրների թվով։ Կորոնավիրուսի սկզբնաղբյուր հանդիսացող Չինաստանում մարտի վերջին կառավարությունը հայտարարեց, որ համաճարակը դադարել է, երկիրն այս պահին աշխարհում վարակակիրների թվով աշխարհում 6-րդն է։

ՀՀ-ում մարտի 16-ից մինչև ապրիլի 14-ն արտակարգ դրություն է՝ կորոնավիրուսի տարածումը կանխելու համար: Երկրում մինչև ապրիլի 12-ը խիստ սահմանափակումներ են նախատեսված։ Հայաստանում ապրիլի 4-ի առավոտվա դրությամբ կորոնավիրուսով վարակի դեպքերի թիվը հասել է 770-ի՝ նախորդ օրվա համեմատ ավելանալով 34-ով:

Առողջապահության նախարարությունում գործում է շուրջօրյա «թեժ գիծ» ծառայություն 8003 և «օպերատիվ զանգերի կենտրոն» 060838300 հեռախոսահամարներով:

Ընթերցեք նաև․ Կորոնավիրուսից խուսափելու համար խորհուրդներ` ԱՀԿ-ից