Բռնության հրապարակային կոչերը կքրեականացվեն. Օրինագիծն ընդունվել է

PanARMENIAN.Net - Բռնության հրապարակային կոչը և դրա արդարացումը քրեականացնող օրենքի նախագիծն երկրորդ ընթերցմամբ և ամբողջությամբ ընդունվել է։

Կողմ է քվեարկել 97 պատգամավոր, դեմ՝ 14-ը, ձեռնպահներ չեն եղել։

Խոսքն անձի հանդեպ որևէ սոցիալական կամ անձնական բնույթի հանգամանքով պայմանավորված բռնություն գործադրելու հրապարակային կոչերի մասին է, նման բռնությունը հրապարակային արդարացնելու կամ քարոզելու:

Օրինագծով քրեական պատասխանատվություն է սահմանվում անձի կամ անձանց խմբի նկատմամբ՝ սեռով, ռասայով, մաշկի գույնով, էթնիկական կամ սոցիալական ծագումով, գենետիկական հատկանիշներով, լեզվով, կրոնով, աշխարհայացքով, քաղաքական կամ այլ հայացքներով, ազգային փոքրամասնության պատկանելությամբ, գույքային վիճակով, ծնունդով, հաշմանդամությամբ, տարիքով կամ անձնական կամ սոցիալական բնույթի այլ հանգամանքներով պայմանավորված բռնություն գործադրելու հրապարակային կոչեր հնչեցնլու համար:

Ավելի վաղ ԱԺ-ում ատելության խոսքի դեմ պայքարող աշխատանքային խումբ էր ստեղծվել, որի ղեկավար էր ընտրվել «Իմ քայլը» խմբակցության պատգամավոր Սարգիս Խանդանյանը։