ԵՄ-ն հաստատակամ է անդամ պետությունների միջև ներքին սահմանները բացելու հարցում

PanARMENIAN.Net - Եվրահանձնաժողովի փոխնախագահ Մարգրետե Վեստագերը հայտարարել է, որ Եվրամիությունը հաստատակամ է անդամ պետությունների միջև ներքին սահմանները բացելու հարցում։ Այդ մասին նա ասել է՝ ընդգծելով, որ դա է 2020-ի զբոսաշրջային սեզոնը գոնե մասամբ փրկելու միակ տարբերակը:

«Այսօր մեր կողմից ներկայացվող փաթեթի հիմքում դրված է անվտանգության ապահովման գաղափարը: Մեր հանձնարարականների հիմքում հենց դա է` զբոսաշրջության ոլորտի աստիճանական և խիստ զգուշավոր վերագործարկումը, որ հիմնված կլինի նախևառաջ գիտական խորհուրդների վրա», - հայտարարել է Եվրահանձնաժողովի փոխնախագահը, տեղեկացնում է «Ազատություն» ռադիոկայանը:

Եվրահանձնաժողովի պաշտոնյաներն ընդգծում են, որ ներեվրոպական տուրիզմի աշխուժացումը հարկավոր է համադրել անվտանգության խիստ միջոցառումների կիրառման հետ:

Մասնավորաբար նախատեսվում է, որ ուղևորներն ու ավիաընկերությունների աշխատակիցները պարտավոր են լինելու օդանավերում պաշտպանիչ դիմակներ կրել: Երկաթուղային տրանսպորտի վերագործարկման գլխավոր նախապայմանն էլ դառնալու է գնացքներում սոցիալական հեռավորության պահպանումը:

«Մարդիկ իհարկե պետք է հնարավորություն ունենան ճանապարհորդելու եվրոպական երկրների տարածքում․․․ Զբոսաշրջիկները պետք է հստակ իմանան, որ այն հյուրանոցները, լողափերը, տեսարժան վայրերը, որ իրենք են այցելելու, վտանգ չեն ներկայացնում, և այնտեղ գործադրվելու են բոլոր ջանքերը կորոնավիրուսի տարածման հնարավորությունը նվազագույնի հասցնելու համար», - նշել է Եվրահանձնաժողովի փոխնախագահը:

Զբոսաշրջությունը Եվրամիության տնտեսության մոտ 10 տոկոսն է կազմում, ուստի այդ ոլորտի աշխուժացումը կարող է որոշակիորեն մեղմել տնտեսական այն ճգնաժամը, որ ծագել է կորոնավիրուսի համաճարակի հետևանքով: