Եռաչափ մոդել՝ Ֆիրդուսի կառուցապատման նախագծից. 250 մ հետնիոտնային ճանապարհ ու նորակառույցներ

28 հուլիսի 2020 - 16:48 AMT

PanARMENIAN.Net - ՀՀ փոխվարչապետ Տիգրան Ավինյանի գրասենյակի ղեկավար Վարագ Սիսեռյանը եռաչափ կադրեր է հրապարակել, որտեղ ներկայացված է Երևանի կենտրոնում՝ Ֆիրդուսի թաղամասում նախատեսվող կառուցապատման աշխատանքների ընդհանուր պատկերը։

Սիսեռյանը հիշեցրել է, որ կառուցապատողների հետ բանակցությունների արդյունքում մի շարք փոփոխություններ են արվել նախագծում։

«Նշել էինք, որ Հանրապետության և Տիգրան Մեծ փողոցներին հարակից հուշարձանները պահպանվելու են իրենց տեղերում և վերարժևորվելու են շենքերի բակային ճակատները: Իսկ հուշարձան-շենքերին հաջորդելու են 2-4 հարկանի շենքեր՝ փայտե պատշգամբներով, ինչի արդյունքում տվյալ տարածքում ստեղծվելու է նոր, համահունչ զբոսաշրջային միջավայր: Տարածքը եզրագծվելու է 250մ հետիոտնային ճանապարհով, որից այն կողմ արդեն կլինեն նորակառույց շենքերը»,-գրել է նա։

Ավելի վաղ ակտիվիստները բարձրաձայնել էին, որ Հին Երևանի Ֆիրդուսի թաղամասի շենքերից մեկը քանդվում է։ Հետագայում քաղաքապետարանից հայտարարել էին, որ այն ոչ թե քանդվում, այլ տեղափոխում է։ Թաղամասի շուրջ ստեղծված աղմուկից հետո Երևանի գլխավոր ճարտարապետ Արթուր Մեսչյանը հայտարարել էր, որ Ֆիրդուսի ծրագիրը կասեցնելը սաբոտաժ կլինի, այնտեղ մոտ 10,000 շինարար 3 տարի ժամկետով $250 մլն-ի ծրագիր է իրականացնելու։