Իսրայելը կարող է մերժել Թուրքիային սպառազինության մատակարարման հարցում: Այդ մասին գրում է The Jerusalem Post թերթը: Հրատարակողների կարծիքով, իսրայելա-թուրքական հարաբերություններում առաջացած լարման հետ մեկտեղ կարող է վերանայվել նաեւ համագործակցությունը այլ ոլորտներում, առաջին հերթին` ռազմական: «Իսրայելի պաշտպանության նախարարությունը դիտարկում է Թուրքիային սպառազինություն մատակարարելուց հրաժարվելու հնարավորությունը: Թել-Ավիվում աճում է անհանգստությունն այն առիթով, որ թուրք զինվորականները կարող են կորցնել իրենց իշխանությունն ու ազդեցությունը կառավարությունում, իսկ չափավոր արաբական երկրները եւ Թուրքիան հույս ունեն ամրապնդելու իրենց կապերը: Ինչպես մենք սպառազինություն չենք վաճառում Հորդանանին ու Եգիպտոսին, նույնանման որոշում կարող է կայացվել նաեւ Թուրքիայի առնչությամբ»,- նշեց թերթի աղբյուրը Իսրայելի կառավարությունում:

Պաշտպանության նախարարությունը անհանգստացած է նրանով, որ Թուրքիայի հետ հարաբերությունների դիվանագիտական ճգնաժամը կարող է հանգեցնել նաեւ նրան, որ Անկարան չեղյալ հայտարարի Թուրքիայի օդային տարածքով իսրայելյան ՌՕՈՒ տված թռչելու թույլտվությունը: Թեեւ Իսրայելի ՊՆ-ը պատրաստվում է վերանայել իր հարաբերությունները Անկարայի հետ, մյուս նախարարությունները անհանգստություն են հայտնում երկու երկրների միջեւ առեւտրա-տնտեսական հարաբերությունների կրճատման առիթով: Իսրայելի եւ Թուրքիայի միջեւ տնտեսության ոչ ռազմական ոլորտին բաժին է ընկնում գրեթե $4 միլիարդ, որը կազմում է Իսրայել կատարվող թուրքական ներկրման 60%: