Կրեմլը պատրաստ է օգնել Նավալնուն արտերկրում բուժվելու հարցում

PanARMENIAN.Net - Կրեմլը պատրաստ է դիտարկել ընդդիմադիր գործիչ, Կոռուպցիայի դեմ պայքարի հիմնադրամի հիմնադիր Ալեքսեյ Նավալնուն ավիահաղորդակցության բացակայության պայմաններում արտերկիր տարհանելու հարցը։ Այդ մասին հայտարարել է ՌԴ նախագահի մամուլի քարտուղար Դմիտրի Պեսկովը, գրում է «Վեդոմոստին»։

«Եթե դիմեն Կրեմլին, կամ առողջապահության նախարարությանը, կամ ցանկացած գերատեսչության՝ բնականաբար, ՌԴ քաղաքացիներից շատերն այս օրերին, թեև սահմանները փակ են, մեկնում են արտերկիր բուժման։ Եվ, անշուշտ, մենք պատրաստ կլինենք շատ արագ դիտարկելու այդ դիմումները, եթե այդպիսիք լինեն»,- ասել է Պեսկովը։

Ավելի վաղ հայտնի դարձավ, որ Ալեքսեյ Նավալնին շտապ հոսպիտալացվել է թունավորման կասկածանքով։ Այդ մասին Twitter-ի իր միկրոբլոգում տեղեկացրել է նրա մամուլի քարտուղար Կիրա Յարմիշը։Ըստ նրա՝ Նավալին վատ է զգացել ինքնաթիռում, որով Տոմսկից Մոսկվա էր վերադառնում։ Ինքնաթիռը շտապ վայրէջք է կատարել Օմսկում, Նավալնուն հոսպիտալացրել են։ Յարմիշը հավելել է, որ նրան, հավանաբար, թունավորել են՝ ինչ-որ բան խառնելով թեյին։Նավալնին այժմ կոմայի մեջ է։ Պաշտոնական ախտորոշումը դեռ չի հրապարակվել։