Արաբկիրի նախկին թաղապետի կողմից կոռուպցիոն մեխանիզմների գործադրման և խարդախության դեպքեր են բացահայտվել

PanARMENIAN.Net - Ազգային անվտանգության ծառայությունը Երևանի Արաբկիր վարչական շրջանի ղեկավարի պաշտոնը 2005-2008թթ․զբաղեցնող անձի կողմից կոռուպցիոն մեխանիզմների գործադրման և խարդախության դեպքեր է բացահայտել։ Նա պաշտոնեական կեղծիքներ կատարելով, խարդախությամբ համայնքի՝ առանձնապես խոշոր չափերով գույքի նկատմամբ ձեռք է բերել իրավունք, համայնքի հաշվեկշռում առկա մի շարք անշարժ գույքեր, ձևական աճուրդների կամ ուղղակի վաճառքի միջոցով շուկայական և կադաստրային արժեքներից անհամեմատ ցածր գներով օտարել է տարբեր քաղաքացիների, որի արդյունքում համայնքին հասցվել է առանձնապես խոշոր չափերով՝ 300,000,000 դրամի վնաս։

2005-2008թթ․Երևանի Արաբկիր վարչական շրջանի ղեկավարի պաշտոնը զբաղեցրել է Հովհաննես Շահինյանը։

2006-ին և 2007-ին կեղծարարություններով օտարվել և շուկայական/կադաստրային արժեքից էժան վաճառվել են Երևանի Մամիկոնյանց փողոցի 3-րդ շենքի, 79քմ. մակերեսով թիվ 60 բնակարանը և Թբիլիսյան 3/3 հասցեում գտնվող, համայնքի ղեկավարին սանմաքրման և աղբահանման աշխատանքների համար անհատույց օգտագործման իրավունքով տրամադրված 16687քմ. մակերեսով հողատարածքը՝ իր վրա գտնվող շենք-շինություններով։ Շենք-շինություններն օտարվել են պաշտոնատար անձի հորը` Ե. Շ.-ին։ Վերջինս, վճարելով հողատարածքի կադաստրային արժեքը, դարձել է դրա սեփականատերը, ապա բաժանելով 2 մասի, վաճառել է:

Նաև կոռուպցիոն մեխանիզմի գործադրմամբ համայնքապատկան հողամասերը և գույքը կադաստրային արժեքից զգալիորեն ցածր գնով օտարելու այլ դեպքեր կան։

Հարուցվել է քրեական գործ:

Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով՝ դատարանի՝ օրինական ուժի մեջ մտած դատավճռով: