ՀՅԴ-ն պահանջում է փոխել Ծառուկյանի խափանման միջոցը

ՀՅԴ-ն պահանջում է փոխել Ծառուկյանի խափանման միջոցը

PanARMENIAN.Net - ՀՅԴ Հայաստանի Գերագույն մարմինը հայտարարություն է տարածել՝ պահանջելով դադարեցնել իրականացվող քաղաքական հետապնդումները, փոխել ԲՀԿ առաջնորդ Գագիկ Ծառուկյանի նկատմամբ ապօրինի կիրառված խափանման միջոցը:

Նշվում է, որ Հայաստանը հայտնվել է բախտորոշ շրջափուլում. «իշխանությունները երկիրը կանգնեցրել են արտաքին և ներքին լրջագույն սպառնալիքների առջև»։

«Մեր պետականությունը խաթարող մարտահրավերները համազգային միասնականությամբ դիմագրավելու փոխարեն՝ իշխանությունները սաստկացրել են ընդդիմադիր քաղաքական ուժերին և ընդդիմախոսներին իրավունքի ոտնահարմամբ լռեցնելու, հալածանքներն ու հաշվեհարդարները շարունակելու գործելաոճը:

ԲՀԿ առաջնորդին կալանավորելու մասին հապշտապ որոշումը իշխանությունների արատավոր ուղեգծի դրսևորումներից է, որով փորձ է կատարվում թանձրացնել վախի մթնոլորտը և հասարակական տրամադրությունները շեղել իշխող վարչակարգի` բոլոր ոլորտներում արձանագրած ձախողումներից: Անթույլատրելի և դատապարտելի է իշխանությունների այս արատավոր գործելաոճը»,-ասվում է հայտարարության մեջ։

Նշվում է, որ ընդդիմադիր քաղաքական ուժերի և ընդդիմախոսների «քաղաքական հալածանքները չդադարեցնելու դեպքում» հետևանքների պատասխանատվությունը կրում է իշխող ուժը:

«Հոկտեմբերի 8-ին եռյակի նախաձեռնած համապետական հանրահավաքը նոր որակի իշխանության ձևավորման կարևորագույն հանգրվանն է»,-ասվում է հայտարարության մեջ։

Սեպտեմբերի 25-ի երեկոյան «Բարգավաճ Հայաստան» կուսակցության ղեկավար Գագիկ Ծառուկյանը կալանավորվել է։ Նման որոշում է կայացրել Երևանի ընդհանուր իրավասության դատարանը։ Նման միջնորդությամբ դատարան էր դիմել ԱԱԾ-ն։

ԱԱԾ-ն հունիսի 14-ին խուզարկություն էր իրականացրել Ծառուկյանի առանձնատանը, ավելի ուշ նրա դեմ 3 քրգործ էր հարուցվել ապօրինի ձեռնարկատիրական գործունեության, ընտրակաշառք բաժանելու և հողատարածքների օտարման փաստերով։

Վերաքննիչ դատարանը որոշել էր բեկանել Երևանի ընդհանուր իրավասության դատարանի որոշումը (Երևանի ընդհանուր իրավասության դատարանը մերժել էր Ծառուկյանի նկատմամբ կալանքը որպես խափանման միջոց ընտրելու՝ ԱԱԾ-ի միջնորդությունը)` այն առաջին ատյանի դատարան նոր քննության ուղարկելով։ Սեպտեմբերի 22-ին գլխավոր դատախազի խորհրդական Գոռ Աբրահամյանը հայտնել էր, որ Ծառուկյանի նկատմամբ կալանքը որպես խափանման միջոց ընտրելու որևէ նոր միջնորդություն չի ներկայացվել դատարան։

 Ուշագրավ
Մարուքյանն ասել է՝ չի վստահում վարչապետի խոսնակին ու իրենց հայտարարություններին
Հանդիպման նախաձեռնողը ՀՀ նախագահն է
Նա նշել է, որ ՀՀ և ՌԴ ՊՆ-ների միջև շատ ինտենսիվ շփումներ կան