ԱԺ «Լուսավոր Հայաստան» խմբակցության նախագահ Էդմոն Մարուքյանն Ազգային ժողովում հայտարարել է, որ պատգամավորները՝ տեղյակ լինելով Արցախում տիրող իրավիճակին, պետք է տեղյակ լինեն նաև, թե ինչ է կատարվում արտաքին քաղաքական դաշտում։
«Պետք է իմանանք՝ ինչ խոսակցություն է գնում ՌԴ նախագահ Վլադիմիր Պուտինի հետ, Ֆրանսիայի նախագահ Էմանուել Մակրոնի, ինչպես նաև ԱՄՆ բարձրաստիճան պաշտոնյաների»,- ասել է Մարուքյանը։
Դիմելով ԱԺ նախագահ Արարատ Միրզոյանին՝ Մարուքյանը հավելել է, որ այդ նպատակով հարկավոր է հանդիպում կազմակերպել վարչապետ Նիկոլ Փաշինյանի հետ։
«Դա կարող է լինել ցանկացած ժամի, թեկուզ գիշերը ժամը 3-ին, և ցանկացած ձևաչափով»,- ասել է նա՝ հավելելով, որ հարցեր ունի, որոնք կարող է հասցեագրել միայն վարչապետին։
Ադրբեջանը սեպտեմբերի 27-ի վաղ առավոտյան Արցախի ուղղությամբ սկսել է օդային և հրթիռային հարձակում՝ թիրախավորելով թե ռազմական օբյեկտներ, թե քաղաքացիական ենթակառուցվածքներ, այդ թվում՝ Ստեփանակերտում։ ՀՀ-ում և Արցախում ռազմական դրություն է հայտարարված։
