Արգելվում է ՀՀ և Արցախի անվտանգության դեմ քարոզչությունը. Ռազմական դրության որոշումը լրացվել է

Արգելվում է ՀՀ և Արցախի անվտանգության դեմ քարոզչությունը. Ռազմական դրության որոշումը լրացվել է

PanARMENIAN.Net - Արգելվում է Հայաստանի Հանրապետության և Արցախի Հանրապետության պաշտպանունակության ու անվտանգության դեմ քարոզչությունը, այդ թվում` ՀՀ-ի ու ԱՀ-ի պաշտպանունակությունը կասկածի տակ դնող հաղորդումների հրապարակումը, հայտնում են Կառավարությունից՝ նշելով, որ «ՀՀ-ում ռազմական դրություն հայտարարելու մասին» որոշումը լրացվել է նոր կետերով, որոշման մեջ փոփոխություններ են կատարվել:

«Պետական և տեղական ինքնակառավարման մարմինների և պաշտոնատար անձանց` ռազմական դրության իրավական ռեժիմի ապահովմանը և պետական անվտանգության ապահովմանն առնչվող գործողությունները (այդ թվում` ելույթները, հրապարակումները) քննադատող, հերքող, դրանց արդյունավետությունը կասկածի տակ դնող կամ որևէ այլ կերպ արժեզրկող հաղորդումների հրապարակումն արգելվում է»,-ասվում է որոշման մեջ, որն ուժի մեջ է մտել հրապարակելուց հետո՝ անմիջապես։

Նախատեսված կանոնների պահպանման նկատմամբ հսկողություն է իրականացնում Հայաստանի ոստիկանությունը:

«Հայաստանի Հանրապետության ոստիկանությունն իրավասու է անհրաժեշտ միջոցներ ձեռնարկել ապահովելու հրապարակված հաղորդումների և տեղեկությունների վերացումը, իրականացնելու տպագրող սարքերի, ռադիոհեռարձակող, ձայնաուժեղացնող տեխնիկական միջոցների, բազմացնող տեխնիկայի ժամանակավոր առգրավում կամ կալանք»,-նշված է որոշման մեջ։

Ադրբեջանը սեպտեմբերի 27-ի վաղ առավոտյան Արցախի ուղղությամբ սկսել է օդային և հրթիռային հարձակում՝ թիրախավորելով թե ռազմական օբյեկտներ, թե քաղաքացիական ենթակառուցվածքներ, այդ թվում՝ Ստեփանակերտում։ ՀՀ-ում և Արցախում ռազմական դրություն է հայտարարված։

 Ուշագրավ
Նա կշարունակի գործունեությունը որպես անկախ պատգամավոր
Վարչապետը ստորագրել է համապատասխան որոշումները
Նոյեմբերի 23-ին Արայիկ Հարությունյանն ազատվել է ԿԳՄՍ նախարարի պաշտոնից