Գերմանիայի Բունդեսթագի ընդդիմադիր Ձախ կուսակցության պատգամավոր Սևիմ Դաղդելենը առաջարկել է երկրի տարածքում արգելել թուրքական «Գորշ գայլերի» ու դրա արբանյակ խմբավորումների գործունեությունը։

Նրանց նախաձեռնությանը հավանություն է տվել նախ երկրի Կանաչների կուսակցությունը, ապա դրան միացել է նաև կանցլեր Անգելա Մերկելի Քրիստոնեա-դեմոկրատական կուսակցությունը։

«Դաշնային կառավարությունը պետք է անհապաղ հետևի Ֆրանսիայի օրինակին և արգելի երկրում «Գորշ գայլերի» գլխավոր հովանցող կազմակերպության՝ Գերմանիայի դեմոկրատական ազգայնական թուրքական ասոցիացիաների ֆեդերացիայի (ADÜTDF) գործունեությունը»,- նշել է Դաղդելենը, փոխանցում է DuvaR-ը:

Դաղդելենը հայտնել է, թե ADÜTDF-ը ծայրահեղ աջ և ազգայնական խոշոր կազմակերպություն է ու տարբեր գնահատականներով ունի մոտ 7000 անդամ և 170 լոկալ ասոցիացիա։

Պատգամավորի խոսքով՝ այդ կազմակերպությունը նպատակ ունի քրդերի, հայերի, ալևիների, հույների և հրեաների դեմ սադրանքներ հրահրելով Գերմանիայում հասարակությանը մասնատել ու բևեռացնել։

«Թուրքիայում «Գորշ գայլերը» իշխանության կոալիցիոն գործընկեր՝ աջակողմյան թուրքական կուսակցության՝ «Ազգայնական շարժման» հետ միասին սերտ կապեր ունեն իշխող «Արդարություն և զարգացում» կուսակցության և նախագահ Ռեջեփ Թայիփ Էրդողանի շրջապատի հետ, որոնք հետապնդում և ահաբեկում են նրանց, ովքեր իրենց հետ համամիտ չեն»,-հայտարարել է Դաղդելենը:

Նա նշել է նաև, որ զրոյական հանդուրժողականություն պետք է լինի իսլամիստական և ֆաշիստական կազմակերպությունների նկատմամբ և հենց դրա համար իրենք պետք է հետևեն Ֆրանսիայի օրինակին։

Ֆրանսիայի ներքին գործերի նախարար Ժերալ Մուսա Դարմանեն 2020թ. նոյեմբերի 4-ին հայտարարել է, որ Ֆրանսիայում թուրքական ծայրահեղ ազգայնական «Գորշ գայլեր» կազմակերպության գործունեությունը պաշտոնապես արգելվել է: