Փաշինյան․ Կատարվածի պատճառները պիտի պարզվեն` հանրությունը պետք է հստակ պատասխաններ ստանա

PanARMENIAN.Net - Նույնիսկ դժվար ժամանակներում ՀՀ-ում պետք է ստեղծել բարեփոխումների հետագա շարունակականության երաշխիք՝ ընդ որում բարեփոխումների ընդգրկումն ու օրակարգը պետք է ընդլայնվի՝ ի հայտ եկած նոր մարտահրավերների բերումով։ Այս մասին է հայտարարել վարչապետ Նիկոլ Փաշինյանը կառավարության նիստի ընթացքում։

Իր խոքքերով, պետք է տեղի ունենա նաև կատարվածի պատճառների վերհանման, պարզաբանման և վերլուծության գործընթաց, և հայ հանրությունը պետք է ստանա հստակ պատասխաններ, թե ինչ է տեղի ունեցել և ինչու։ Ժողովուրդը պետք է հասու լինի ճշմարտությանը և որոշումներ կայացնելու հնարավորություն ունենա։ Կառավարության ամենակարևոր անելիքը ՀՀ քաղաքացիների՝ սեփական երկրի և իրավիճակի տերը լինելու զգացողության փաստի պահպանումն է և այս հանգամանքի ինստիտուցիոնալ հզորացումը»,-հայտարարել է նա։

Վարչապետի խոսքով՝ բացարձակ առաջնահերթություն են գերիների ու անհետ կորածների վերադարձը, բարդությունն այն, որ աշխատանքի արդյունավետությունը ոչ միայն հայկական կողմից է կախված։

«Որպես ՀՀ վարչապետ ինձ վրա եմ վերցնում ստեղծված իրավիճակի ամբողջ պատասխանատվությունը, բայց գիտակցում եմ, որ ինձ վրա է ոչ միայն մինչև օրս տեղի ունեցածի, այլև հետագա զարգացումների պատասխանատվությունը։ Ներքին կայունության ու անվտանգության ապահովումը և իմ հրապարակած ճանապարհային քարտեզի իրականացումը բացարձակ անհրաժեշտություն է, և մեր բոլոր ջանքերը պետք է ուղղված լինեն դրան»,-հայտարարել է Փաշինյանը։

Սեպտեմբերի 27-ից Արցախի դեմ Ադրբեջանը պատերազմ էր սանձազերծել՝ ահաբեկիչ-վարձկանների ու թուրքերի անմիջական աջակցությամբ։ Նոյեմբերի 10-ին վարչապետ Նիկոլ Փաշինյանը հայտարարեց, որ ՌԴ ու Ադրբեջանի նախագահների հետ պատերազմի դադարեցման համաձայնության է եկել։ Ըստ դրա՝ Ադրբեջանը և Հայաստանը կանգ առան իրենց զբաղեցրած դիրքերում: Իսկ ՌԴ խաղաղապահները տեղակայվեցին ԼՂ շփման գծի երկայնքում և Հայաստանի հետ կապող միջանցքում: Պատերազմի ընթացքում հայկական կողմը տարածքային կորուստներ ունեցավ որոշ ուղղություններով, այդ թվում կորցրեց Շուշին։ Բացի այդ, ըստ եռակողմ հայտարարության, հայկական կողմը հետ քաշեց զորքերը Աղդամից, նույնը պետք է անի Քարվաճառի պարագայում՝ վերջնաժամկետը նոյեմբերի 25-ն է, իսկ մինչև դեկտեմբերի 1-ը` դուրս գա Լաչինից։