ՀԲ․ 2020-ին ՀՀ-ն 8% տնտեսական անկում կգրանցի, 2021-ին՝ 3․1% աճ

ՀԲ․ 2020-ին ՀՀ-ն 8% տնտեսական անկում կգրանցի, 2021-ին՝ 3․1% աճ

PanARMENIAN.Net - Համաշխարհային բանկի կանխատեսմամբ՝ 2020-ին Հայաստանում 8%-անոց տնտեսական անկում կգրանցվի, 2021-ին տնտեսական աճը կկազմի 3․1%, իսկ 2022-ին՝ 4․5%, ասվում է «Համաշխարհային տնտեսական հեռանկարներ» զեկույցում (Global Economic Prospects)։

Հունիսին Global Economic Prospects-ի զեկույցով ՀԲ-ն 2020-ին Հայաստանի համար կանխատեսել էր 5․2% տնտեսական անկում, 2021-ի համար՝ 1․8%: Հոկտեմբերին արդեն ՀՀ-ի համար 2020-ին 6․3%-անոց տնտեսական անկում էր կանխատեսվում, իսկ 2021-ին` 4․6% աճ։

Ըստ Հայաստանի պետբյուջեի նախագծի՝ 2020-ին նախապես կանխատեսվում էր 4․8% տնտեսական աճ, ավելի ուշ, հաշվի առնելով հանգամանքները (կորոնավիրուսի համավարակ, խմբ․) տարեվերջին կանխատեսվում էր 6% անկում, արդեն հոկտեմբերին (պատերազմի ֆոնին,- խմբ.) կանխատեսվում էր տնտեսական անկման 7․9%-անոց ցուցանիշ։

Հայաստանի Կենտրոնական բանկը 2020-ի համար 7․2% տնտեսական անկում էր կանխատեսել։

2020-ի տարեկան տնտեսական ցուցանիշները պաշտոնապես կամփոփվեն հունվարի վերջին, սակայն արդեն հայտնի է, որ 2009-ից հետո առաջին անգամ Հայաստանի տնտեսությունն անկում է ապրել։ Հայաստանը մինչև 2020-ը տնտեսական անկումներ ապրել է 5 տարի․ ըստ Վիճակագրական կոմիտեի՝ 1991 թվականին 11.7%, 1992-ին՝ 41.8% և 1993-ին՝ 8.8%։ Միջազգային ֆինանսա-տնտեսական ճգնաժամի հետևանքով՝ 2009 թվականին ՀՀ տնտեսությունը 14.1% անկում էր ապրել։

 Ուշագրավ
ՌԱԷԿ-ի մասնագետները ներկայացրել են տեխնիկական սպասարկման և վերանորոգման ուղղությամբ տարվող աշխատանքը
Նա հավելել է, որ էկոնոմիկայի նախարարությունը բիզնեսի համար առավել կոնկրետ առաջարկներով հանդես կգա
Իրանից ներմուծվող ապրանքները մաքսազերծվում են այն գներով, որ տեղական արտադրողը չտուժի
Փոխնախարարի խոսքով՝ համակարգի շահառուների թիվը սրընթաց աճում է, և դա «ռիսկ է, որի հետ պետք է հաշվի նստել»