Առանց վարորդականի երթևեկողները կարող են 200,000 դրամով տուգանվել, ղեկին ծխողները՝ 7000-ով

Առանց վարորդականի երթևեկողները կարող են 200,000 դրամով տուգանվել, ղեկին ծխողները՝ 7000-ով

PanARMENIAN.Net - Առանց վարորդական իրավունքի մեքենա վարողների համար առաջարկվում է սահմանել 200,000 դրամ տուգանք, ղեկին ծխելու համար՝ 7000 դրամ, Ազգային ժողովի պաշտպանության և անվտանգության հարցերի հանձնաժողովի քննարկել ու կողմ է քվեարկել «Վարչական իրավախախտումների վերաբերյալ» ՀՀ օրենսգրքում փոփոխությունների մասին նախագծին։

Նախագծով առաջարկվում է ճանապարհային երթևեկության խախտումների համար տուգանքների վերանայում: ՀՀ փոխոստիկանապետ Արա Ֆիդանյանի խոսքով, եթե վարորդի կողմից տրանսպորտային միջոցի ընթացքի ժամանակ ծխախոտային արտադրատեսակ կամ ծխախոտային արտադրատեսակների փոխարինիչներ օգտագործվեն, կտուգանվի սահմանված նվազագույն աշխատավարձի յոթնապատիկի չափով (7000 դրամ), 1 տուգանային միավոր կկիրառվի:

Առաջարկվել է նաև, որ ճանապարհապարեկային ոստիկանների կողմից արձանագրվող խախտումների համար տուգանային միավորների համակարգի կիրառումը հետաձգել մինչև 2022թ․ հուլիսի 1-ը։ Ըստ Ֆիդանյանի, մինչ այդ, տուգանային միավորը, որպես վարչական տույժ կիրառվելու է միայն տեսանկարահանող սարքերով հայտնաբերված խախտումների վերաբերյալ քննության ենթակա գործերով։

Ֆիդանյանի խոսքով՝ փոփոխությունների նպատակն է ապահովել ճանապարհային երթևեկության ոլորտում կատարվող իրավախախտումների համար կիրառվող տուգանային միավորների համակարգի ամբողջական և պատշաճ գործարկումը, կանխարգելել ճանապարհային երթևեկության հնարավոր խախտումները վարելու իրավունք չունեցող անձանց կողմից, ինչպես նաև երաշախավորել չարամտորեն կատարվող խախտումների դեպքում պատասխանատվության անխուսափելիության սկզբունքը:

«Իմ քայլի» պատգամավոր Արմեն Խաչատրյանի խոսքով էլ, բալային համակարգի կիրառումից հետո այս հարցերը բաց էին մնացել, դրանք տեսանելի են դարձել պրակտիկայի ընթացքում։

«Հիմնականում խնդիրները հետևյալն է՝ ինչ պատասխանատվություն է կրում այն անձը, որը վարորդական իրավունք չունի, նրա նկատմամբ բալային համակարգ չեն կարող կիրառել: Գործող օրենքով մուծում է 29,000 դրամ ու այդ վտանգավոր իրավախախտումն անում: Հիմա առանձին կարգավորում է մտցվում նրանց համար, ովքեր վարորդական իրավունք չունեն ու վարում են մեքենա: Նրանց համար կսահմանվի 200,000 դրամ տուգանք»:

Արմեն Խաչատրյանը նշել է, որ բալային համակարգը կիրառվում է կիսատ՝ 30-40%-ով, սակայն ճանապարհատրանսպորտային պատահարների վերլուծությունը ցույց է տալիս, որ արդեն 25-30 զոհ պակաս է։

«Մարզերում տեսախցիկներ չկան, ընդամենը արագաչափեր են: Երբ պարեկային ծառայությունը կկիրառվի, շատ ավելի լավ արդյունքներ կունենանք»,-ասել է նա։

2020-ի հունվարի 1-ից ՀՀ-ում վարորդների համար ներդրվել է բալային համակարգ, յուրաքանչյուրը ստանում է 9 միավոր։ Մեկ տարվա ընթացքում երթևեկության կանոնների խախտումներ թույլ տալու և այդ միավորները սպառելու դեպքում 6 ամսով կասեցվում է անձի վարորդական իրավունքը:

 Ուշագրավ
Պարզվել է, որ քրեական գործ չի հարուցվել, մեղադրանք առաջադրելու համար էլ ապացույցներ չեն գտել
Պաշտպանը նշել է, որ ադրբեջանական իշխանություններն արհեստական ձգձգում, քաղաքականացնում են գործընթացը
Նա հանցագործության մասին հաղորդում կներկայացնի