Միայն հայ ժողովրդի միասնական ջանքերով է հնարավոր արագ հաղթահարել հետպատերազմյան ծանր շրջանի դժվարությունները և պլանավորել զարգացման ծրագրեր, հայտարարել է Արցախի նախագահ Արայիկ Հարությունյանը՝ ընդունելով բարերար Ալեք Բաղդասարյանին։
Բաղդասարյանը Հայ-ամերիկյան բիզնես խորհրդի նախագահն է, Հայկական առևտրային ցանցի գործադիր խորհրդի անդամ։
Նախագահը բարերարին ընդունել է փետրվարի 3-ին, հանդիպմանը մասնակցել է նաև ԱՀ նախագահի աշխատակազմի ղեկավար Արտակ Բեգլարյանը:
Բաղդասարյանը շնորհակալություն է հայտնել նախագահին ջերմ ընդունելության համար, ներկայացրել, որ Հայ կրթական հիմնարկության ծրագրերի շրջանակում պատրաստվում են Արցախում կրթության զարգացման գործում աջակցության լրացուցիչ աշխատանքներ իրականացնել:
44-օրյա պատերազմի ժամանակ ու դրանից հետո Արցախին հումանիտար օգնություն են ուղարկել աշխարհի տարբեր հատվածներից։ Ավելի վաղ ՀՀ աշխատանքի և սոցիալական հարցերի նախարարը հայտարարել էր, որ Արցախում այս պահին սոցիալական ու հումանիտար խնդիր չկա։
