Քաշաթաղցիներից երկու ներկայացուցիչ կմասնակցի փոխվարչապետ Մհեր Գրիգորյանի գլխավորած՝ Արցախի հարցերով աշխատանքային խմբի հաջորդ նիստին, որի ժամանակ քաղաքացիները կներկայացնեն խնդիրների լուծման իրենց մոտեցումները: Որոշումը կայացվել է փոխվարչապետի և Քաշաթաղից տարհանված անձանց ներկայացուցիչների հանդիպմանը։
Քաշաթաղցիները ներկայացրել են փոխվարչապետ Մհեր Գրիգորյանին տարհանումից հետո իրենց առջև ծառացած հիմնական խնդիրները:
Հանդիպման ընթացքում քննարկվել են, մասնավորապես, Արցախին ուղղված ՀՀ կառավարության կողմից նախաձեռնված աջակցության ծրագրերի ընթացքը, դրանցից օգտվելու ընթացքում առաջացած խոչընդոտները և դրանց վերացման ուղղությամբ հնարավոր լուծումները:
Ավելի վաղ իրենց տունն ու գույքը կորցրած Քաշաթաղի մի խումբ բնակիչներ բողոքի ակցիա են իրականացրել կառավարության շենքի դիմաց ` պահանջելով կորցրած գույքի փոխհատուցում: Քաշաթաղի շրջանը Ադրբեջանին հանձնվեց դեկտեմբերի 1-ին։ 54 համայնքից հայկական կողմին է մնացել երեքը՝ Բերձորը, Աղավնոն, Սուսը։
