Կարմիր խաչի միջազգային կոմիտեի ներկայացուցիչներն Ադրբեջանում այցելել են գերեվարված 4 հայի, նրանք հնարավորություն են ունեցել կապվել ընտանիքի անդամների հետ, հայտնել է Կարմիր խաչի միջազգային կազմակերպության Հայաստանի գրասենյակի հաղորդակցման և կանխարգելման ծրագրերի ղեկավար Զառա Ամատունին, փոխանցում է Forrights․am-ը։

«Փետրվարի 1-ին և 2-ին Կարմիր խաչի միջազգային կոմիտեի ներկայացուցիչներն Ադրբեջանում այցելել են 4 հայ անձի՝ և՛ քաղաքացիական, և՛ զինվորական, որոնք պահվում են Ադրբեջանում վերջին էսկալացիայի հետևանքով»,- ասել է Ամատունին։

Նա նշել է, որ կոմիտեի ներկայացուցիչները ծանոթացել են գերիների պահման պայմաններին, տեղեկացել նրանց առողջական վիճակի մասին։

Հայաստանը Մարդու իրավունքների եվրոպական դատարան է ներկայացրել 228 գերեվարված անձանց վերաբերյալ հարցում: Հայ ռազմագերիների մասին հստակ տեղեկություն ադրբեջանական կողմը չի հայտնում։ 44-օրյա պատերազմից հետո ՀՀ էին վերադարձել նախ 44, ապա ևս 5 ռազմագերի։