ՀՀ Կենտրոնական բանկի նոր քաղաքականությունն արդարացված է եւ բարենպաստ պայմաններ է ստեղծում ինչպես արտահանողների, այնպես էլ ներկրողների համար: Այդ մասին, ելույթ ունենալով հայկական հեռուստաալիքների եթերում, հայտնել է Հայաստանի վարչապետ Տիգրան Սարգսյանը: Նրա խոսքով, ներկայումս շատերը հայտարարում են լողացող փոխարժեքին սահուն անցնելու անհրաժեշտության` ազգային տարադրամի փոխարժեքի աստիճանական իջեցման մասին, բայց այդ մեթոդը կհանգեցներ մի շարք բացասական երեւույթների: Մասնավորապես, նկատել է վարչապետը, նման մեթոդը կհանգեցներ շուկայի մասնակիցների զգալի բացասական սպասումներին, ինչին կարող էին հաջորդել առքուվաճառքները, եւ որպես հետեւանք` փոխարժեքի զգալի եւ կտրուկ տատանումներ, ինչպես նաեւ փոխարժեքի հետագա շարժման անորոշությունը: Տվյալ դեպքում, շարունակել է Տիգրան Սարգսյանը, Կենտրոնական բանկը հաստատել է մի միջակայք, որի սահմաններում էլ տատանվելու է ազգային տարադրամի փոխարժեքը: Դա պարզություն է մտցնում շուկայի բոլոր մասնակիցների համար, ինչը թույլ է տալիս խուսափել ավելորդ խառնաշփոթից, ամփոփել է նա: