ՄԻՊ․ Տեղահանվել է մոտ 100,000 խաղաղ բնակիչ, սպանվել` 72, անօթևան մնացել՝ 40,000

13 փետրվարի 2021 - 11:15 AMT

PanARMENIAN.Net - Մարդու իրանունքների պաշտպան (ՄԻՊ) Արման Թաթոյանը ֆեյսբուքյան իր էջում կարևոր փաստեր է հրապարակել Ադրբեջանի սանձազերծած` 2020թ. սեպտեմբեր-նոյեմբեր ամիսների պատերազմի ընթացքում Արցախում խաղաղ բնակիչների իրավունքների կոպիտ խախտումների վերաբերյալ։

Նշվում է, որ պատերազմի ընթացքում իրենց մշտական, հայրենի բնակավայրերից տեղահանվել է ավելի քան 100,000 խաղաղ բնակիչ:

Պատերազմի հետևանքով անօթևան է դարձել մոտ 40,000 մարդ՝ զրկվելով իրենց տներից, անձնական իրերից, կենսական տարրական պայմաններում ապրելու հնարավորությունից և այլ իրավունքներից:

«Ադրբեջանական զինված ուժերի հարձակումների հետևանքով պատերազմի ընթացքում կրթությունից զրկվել է դպրոցական ու մանկապարտեզի տարիքի մոտ 30,000 երեխա: Վնասվել կամ ավերվել է 12 մանկապարտեզ և 71 դպրոց:

2020թ. սեպտեմբերի 27-ից մինչև 2021 հունվարի 28-ը սպանվել է 72 քաղաքացիական անձ, այդ թվում` դաժան վերաբերմունքի, խոշտանգման արդյունքում:

Վիրավորում է ստացել 163 խաղաղ բնակիչ, այդ թվում՝ հաշմանամություն ձեռք բերել, առողջությունն է ողջ կյանքի համար խեղվել»,-ասվում է գրառման մեջ:

ՄԻՊ-ը տվյալները ներկայացրել է ըստ Արցախի մարդու իրավունքների պաշտպանի զեկույցների: