Microsoft կորպորացիայի հիմնադիր Բիլ Գեյթսը մտադիր է առաջիկա 5 տարում մոտ $2 մլրդ հատկացնել կլիմայի փոփոխության դեմ պայքարին։ Այդ մասին նա ասել է գերմանական Handelsblatt թերթին։
Գեյթսը մտադիր է միջոցները ներդնել ստարտափ ընկերությունների և այլ նախագծերի մեջ։ Ըստ նրա,` կլիմայական աղետը պետք է կանխել տեխնոլոգիական նորարարությունների միջոցով։
«Դա հնարավոր է, բայց շատ բարդ կլինի»,- ասել է նա, գրում է ՏԱՍՍ-ը։
Միաժամանակ Գեյթսը հորդորել է 5 անգամ ավելացնել գլոբալ պետական ներդրումները գիտական հետազոտությունների մեջ՝ առնվազն հասցնելով տարեկան $110 միլիարդի։ Դրանք պետք է ուղղել աշխարհով մեկ էներգիայի վերականգնվող աղբյուրների զարգացմանն ու այլ նորարարություններին։
«Մենք պետք է փոխենք ֆիզիկական տնտեսությունն այնպիսի տեմպերով, որոնք դեռ չեն եղել պատմության մեջ»,-կարծում է Գեյթսը։
Նա կնոջ՝ Մելինդայի հետ գլխավորում է բարեգործական հիմնադրամը, որի աշխատանքի հիմնական ուղղություններից է նաև պայքարը վնասակար հիվանդությունների դեմ զարգացող երկրներում, կրթական և առողջապահական ծրագրեր ԱՄՆ-ում։ Բիլ Գեյթսի անունը հաճախ են կապում կորոնավիրուսի ծագման, պատվաստանյութերի ստեղծման, «չիպավորման» և դավադրության այլ տեսությունների հետ։