Փաշինյանի հանրահավաքը՝ Հրապարակում․ Մեր սխալների մեծագույն պատճառներից մեկը սիրված իշխանություն լինելն է

PanARMENIAN.Net - Հանրապետության հրապարակում մեկնարկել է վարչապետ Նիկոլ Փաշինյանի հրավիրած հանրահավաքը: Վարչապետը ներողություն է խնդրել իրենց ու նախորդ կառավարությունների սխալների համար ու ասել, որ իրենց սխալների մեծագույն պատճառներից մեկը սիրված իշխանություն լինելն է։

Հավաքվածները 1 րոպե լռությամբ հարգել են Արցախյան պատերազմում զոհվածների ու Մարտի 1-ի զոհերի հիշատակը։

Փաշինյանը նշել է, որ իրենց առաջ այժմ անվտանգային, արտաքին քաղաքական, տարածաշրջանային, ներքաղաքական բնույթի մարտահրավերներ կան ու դրանց կառավարումից է կախված երկրի ու ժողովրդի ապագան։

«Հիմա արդեն հասել ենք մի կետի, որ սպառում ենք սխալվելու մեր հնարավորությունները։ Մեր անկախության 31 տարում թույլ ենք տվել բոլոր հնարավոր սխալները, բոլոր սխալները, որ հնարավոր էին տեսականորեն։ Հեղափոխությունից հետո մենք թույլ ենք տվել բոլոր հնարավոր սխալները։ Խոսքը մեր կառավարության, անձամբ իմ մասին է։ Եվ ես ուզում եմ ձեզնից՝ բոլորից, ՀՀ բոլոր քաղաքացիներից, Սփյուռքի բոլոր հայերից, Արցախի բոլոր հայերից, ներողություն խնդրել իմ թույլ տված բոլոր սխալների համար»,- ասել է վարչապետը՝ նշելով, որ ինքը շատ է մտածել՝ ինչու են իրենք սխալվել։

Փաշինյանի խոսքով՝ իր կառավարության սխալների մեծագույն պատճառներից մեկը, որքան էլ տարօրինակ թվա, որպես իշխանություն սիրված լինելն է։

Փաշինյանը նաև ասել է, թե իրենք ձգտել են արդարացնել այդ սերը և ցանկացել են ամեն ինչ անել ճշգրիտ և կատարյալ, և կատարելության փնտրտուքը շատ դեպքերում բերել է անգործության։

Մարտի 1-ի իրադարձությունների 13-րդ տարելիցի օրը Երևանում 4 հանրահավաք է անցկացվում, որից 3-ը՝ գրեթե նույն ժամին։

Հայաստանում քաղաքական իրավիճակը սրվել էր փետրվարի 25-ին վարչապետի կողմից Զինված ուժերի Գլխավոր շտաբի պետ Օնիկ Գասպարյանի հրաժարականի որոշումից ու ԳՇ՝ Փաշինյանի հրաժարականը պահանջելուց հետո։ Նախագահը դեռ չի ստորագրել ԳՇ պետի հրաժարականի որոշումը, այն առարկություններով հետ է ուղարկել վարչապետին, վերջինս՝ կրկին նախագահին։

Ընթերցեք նաև․ Հայրենիքի փրկության շարժման հանրահավաքը՝ Բաղրամյանում (վիդեո)