Նախարար․ Թուրքիայից ապրանքների ներկրման արգելքը պետք է երկարացվի, եթե քաղաքական այլ առաջնահերթություններ չխանգարեն

PanARMENIAN.Net - Թուրքիայից ապրանքների ներկրման արգելքը պետք է երկարացվի, եթե քաղաքական այլ առաջնահերթություններ չխանգարեն։ Շուկայի այս ժամանակահատվածի համար լավագույն լուծումը գոնե մեկ անգամ ևս այն երկարացնելն է, հայտարարել է էկոնոմիկայի նախարար Վահան Քերոբյանը։

«Քանի դեռ մենք այս ջուրն ենք մտել, իմաստ ունի երկարացնել և բավարար ժամանակ տալ մեր տնտեսվարողներին, որպեսզի կարողանան վերադասավորվել, ներդրումներ անել, ստանալ այն արտադրանքի ծավալը, որը թույլ կտա մրցունակ լինել։ Այդքան ժամանակ մենք պատրաստ ենք պաշտպանել մեր տեղական արտադրողներին, որ կարողնան ամրապնդվել շուկայում»,- ասել է Քերոբյանը։

Կառավարությունը հոկտեմբերի 20-ին ժամանակավոր արգելք է դրել թուրքական ծագում ունեցող վերջնական սպառման ապրանքների ներմուծման վրա, այն ուժի մեջ է մտել դեկտեմբերի 31-ին և 6 ամսով: 2019 թվականին Թուրքիայից Հայաստան ապանքների ներմուծումը, ըստ ծագման երկրի հատկանիշի, կազմել է $268.1 մլն։ Թուրքիայից ներմուծվող հիմնական խոշոր ապրանքախմբերն են՝ hագուստ՝ $69.4 մլն, ցիտրուսային պտուղ՝ $10.3 մլն, մեքենաներ, սարքավորումներ և մեխանիզմներ՝ $35.3 մլն, նավթ և նավթամթերք՝ $24.3 մլն, քիմիայի և դրա հետ կապված արդյունաբերության ճյուղերի արտադրանք՝ $23.6 մլն, ոչ թանկարժեք մետաղներ և դրանցից պատրաստված իրեր՝ $21.6։