ԱՀ անվտանգության խորհրդի քարտուղար Վիտալի Բալասանյանն, Արցախի հանրային հեռուստատեսության եթերում անդրադառնալով ՊԲ կազմալուծման մասին լուրերին, հայտարարել է, որ երկիրն ունենալու է ավելի մոբիլ, մարտունակ զինված ուժեր։
«Որևէ մեկի մտքով թող չանցնի, որ Արցախը չի ունենալու Զինված ուժեր»,-ասել է նա։
Բալասանյանը տեղեկացրել է նաև, որ արդեն սկսվել է պայմանագրային հիմունքներով Պաշտպանության բանակի համալրումը՝ այն ընթանում է նորմալ տեմպով, սպասվածից նույնիսկ ավելի լավ։
Նա նշել է, որ ՊԲ կառուցվածքային փոփոխությունների մասին խոսելիս նկատի ունեն ավելի մարտունակ զորքի ձևավորում, որտեղ յուրաքանչյուրը մարտիկ պետք է լինի։
Բալասանյանը նշել է, որ նախատեսվում է բարձրացնել ՊԲ-ում պայմանագրային հիմունքով ծառայելու իրավունք ունեցողների տարիքային շեմը։
Նա նշել է, որ համագործակցությունը ՀՀ ԶՈւ հետ շարունակվում է և միշտ լինելու է։
«Արցախը երբեք չենք թողնելու որևէ մեկի գրկում, Արցախը լինելու է որպես սուբյեկտ, որպես հայկական, երբևէ Ադրբեջանի կազմում չի լինելու»,- ասել է Բալասանյանը:
Ավելի վաղ ՀՀ ՊՆ-ն, արձագանքելով այն հարցին, թե ճիշտ է արդյոք լրատվամիջոցներում տարածվող լուրը, թե նորակոչիկներն այլևս Արցախ չեն մեկնելու ծառայության, PanARMENIAN.Net ի հարցին ի պատասխան նշել էր, որ Զինված ուժերի համալրման հետ կապված (զորակոչի ուղղություն, թվաքանակ, ենթակառուցվածք) տեղեկությունները Կառավարության որոշմամբ համարվում են պետական-ծառայողական գաղտնիք ու հրապարակման ենթակա չեն։
