Մայիսի 9-ին Լոնդոնի «Հայաշեն» Հայկական տեղեկատվական կենտրոնում (Centre for Armenian Information and Advice) տեղի կունենա Գոռ Մխիթարյանի եւ Սոնյա Վարուժյանի համատեղ համերգը: Լոնդոնի հայկական համայնքի անդամները, ինչպես նաեւ հայկական երաժշտության բրիտանացի երկրպագուները կկարողանան ունկնդրել հենց Գոռ Մխիթարյանի եւ Սոնյա Վարուժյանի ստեղծագործությունները ակուստիկ կատարմամբ եւ կիթառի նվագակցությամբ:

Հայկական երաժշտական մրցանակի եւ Big Apple Music Awards-ի դափնեկիր Գոռ Մխիթարյանը PanARMENIAN.Net-ի թղթակցի հետ զրույցում ասել է, որ Լոնդոնում կայանալիք համերգին պատրաստվում է երգեր կատարել իր բոլոր յոթ ձայնասկավառակներից` ներառյալ մի քանի երգեր, որոնք ընդգրկվել են նրա վերջին` «Հոգի» ձայնասկավառակի երգաշարի մեջ: Սոնյա Վարուժյանը մի քանի երաժշտական մրցանակների դափնեկիր է եւ պատրաստվում է որոշ երգեր կատարել իր վերջին` հայալեզու «Ճամփի մոտ» կոչվող ձայնասկավառակից, ինչպես նաեւ հին երգեր, որոնք իրենցից ներկայացնում են կելտական մոտիվների եւ հայկական ազգային երաժշտության խառնուրդ եւ կատարվում են անգլերեն լեզվով:

Մայիսի 10-ին Գոռ Մխիթարյանն ու Սոնյա Վարուժյանը «Հայաշեն» կենտրոնում հանդիպում կանցկացնեն հայ երիտասարդության հետ: Սոնյա Վարուժյանի խոսքով, հանդիպման նպատակը հայկական համայնքի երիտասարդության շրջանում հայկական երաժշտության եւ նրա ստեղծման հանդեպ հետարքրքության աճն է: