Թուրքիայի տրանսպորտի և ենթակառուցվածքների նախարար Ադիլ Քարաիսմաիլօղլուն, որն այցելել էր պատերազմից հետո Ադրբեջանի հսկողությանն անցած տարածքներ և ծանոթացել Ֆիզուլի (Վարանդա)-Շուշի ավտոճանապարհի կառուցման աշխատանքներին, հայտարարել է, որ Ղարաբաղում ստեղծվող տրանսպորտային ենթակառուցվածքները շատ կարևոր են Թուրքիայի համար:
Անդրադառնալով Ադրբեջանի նախագահ Իլհամ Ալիևի և տրանսպորտի նախարար Ռաշադ Նաբիևի հետ հանդիպումներին՝ թուրք նախարարն ասել է, որ շատ կարևոր աշխատանք է տարվում տարածաշրջանում, գրում է Minval.az-ը։
«Մենք ուրախանում ենք Ադրբեջանի հաղթանակով, ինչպես սեփական հաղթանակով: Հետագայում մենք, ինչպես նախկինում, առաջնորդվելով «մեկ ազգ՝ երկու պետություն» կարգախոսով, կվերածնենք Ղարաբաղը։
Այստեղ ստեղծվող տրանսպորտային ենթակառուցվածքները՝ երկաթուղիները և ցամաքային ճանապարհները շատ կարևոր են Թուրքիայի համար: Հուսով ենք, որ աշխատանքներն այստեղ կավարտվեն հնարավորինս սեղմ ժամկետում: Մենք մեր ավանդը կունենանք այս գործընթացում: Երկու եղբայրական երկրները խոշոր նախագծեր կիրականացնեն այս ոլորտում»,-ասել է Քարաիսմաիլօղլուն։
