ԱՆ․ Դիերի պարկերը նախարարությանը տրամադրել է Կարմիր խաչը

PanARMENIAN.Net - Հաշվի առնելով մամուլում և համացանցում շրջանառվող տեղեկատվությունը` ԱՆ «Դատաբժշկական գիտագործնական կենտրոն» ՊՈԱԿ-ի Աբովյանի մասնաճյուղում տեղի ունեցած միջադեպի վերաբերյալ, Առողջապահության նախարարությունը հայտնել է, որ դիերի պարկերը նախարարությանը տրամադրել է Կարմիր խաչի միջազգային կոմիտեն:

Նշվում է, որ ընդհանրապես, դիերը սառնարանային պայմաններում պահվում են +2,+3, +4 ջերմաստիճանի պայմաններում:

Նշվում է նաև, որ Կարմիր խաչի միջազգային կոմիտեն տրամադրած պարկերը հատուկ նախատեսված են դիակների և մասունքների պահպանման համար:

«Ի դեպ, վերջիններն օգտագործվել են ինչպես Ապրիլյան պատերազմի, այնպես էլ` Արցախյան երկրորդ` 44-օրյա պատերազմի ժամանակ` դիտարկվելով արտակարգ իրավիճակներում և պատերազմական գործողությունների ընթացքում, մեծաքանակ զոհերի դեպքում, դիակների տեղափոխման պահպանման համար նախատեսված հատուկ պարկեր»,-ասվում է ԱՆ հայտարարության մեջ:

Նշվում է նաև, որ այդ պարկերի վրա գրվում են փորձաքննության հերթական համարները, քննչական կոմիտեի կողմից նշված հերթական համարը, ինչպես նաև հայտնաբերման վայրը, թե դին կամ մասունքը որտեղից է բերվել:

Ավելի վաղ համացանցում լուրեր էին տարածվել, թե Աբովյանի տուբերկուլոզի հիվանդանոցի «դիահերձարանի հատակին հարյուրավոր զինվորների մարմիններ են պահվում» պոլիէթիլենային տոպրակներով։ Նաև լուսանկարներ են հրապարակվել։ Առողջապահության նախարարությունը, արձագանքելով տեղեկություններին, պաշտոնապես հայտնեց, որ Աբովյանի մասնաճյուղում գտնվող մի քանի մասունք ու դիակ կա, որոնք փորձաքննված և նույնականացված են։

Ավելի ուշ զոհված զինծառայողների ծնողների կողմից արված տեսանյութը հրապարակվեց Աբովյանի տուբերկուլոզի հիվանդանոցի դիահերձարանից, որտեղ նրանք նշում են, որ «դիերը նեխել են»։

Ընթերցեք նաև․ ԱՆ․ Աբովյանի մասնաճյուղի վարիչը և 2 աշխատակից ազատվել են աշխատանքից