Երևանի քաղաքապետի մամուլի խոսնակ Հակոբ Կարապետյանը, ամփոփելով հանրային տրանսպորտի հետ կապված իրադարձությունների արդյունքները, հայտնել է, որ վարորդները վերադարձել են աշխատանքի, իսկ «Երևանի ավտոբուս» ՓԲԸ տնօրեն Էլբակ Թարփոշյանն աշխատանքից ազատման դիմում է ներկայացրել։

«Քաղաքապետարանի ենթակայության տակ գործող տրանսպորտի վարորդների հետ համապատասխան ստորաբաժանումների քննարկումների արդյունքում վարորդները վերադարձել են աշխատանքի: Վարորդների աշխատանքային պայմանների շարունակական բարելավման խնդիրը քաղաքապետարանի օրակարգում է: Քաղաքային իշխանությունն արդեն իսկ գործուն քայլեր արել է և շարունակելու է անել այդ ուղղությամբ:

Քաղաքային իշխանությունը հետևողականորեն իրականացնում է մեր մայրաքաղաքի համար կենսական կարևորություն ունեցող տրանսպորտային բարեփոխումը՝ ստեղծելով անվտանգ, ժամանակակից, հարմարավետ և արժանապատիվ տրանսպորտ երևանցիների համար: Այս գործընթացում հնարավոր կնճիռներն ու խոչընդոտները չեն կարող շեղել քաղաքային իշխանությանը դրված նպատակի իրագործումից»,-ասվում է գրառման մեջ։

Ավելի վաղ վարորդներից մեկն ասել էր, որ իրենք նախևառաջ պահանջում են նորմալ աշխատավարձ։ Նրա խոսքով՝ հիմա իրենք պահանջում են 350,000 դրամ, քանի որ 1 կգ խոզի միսը 4000 դրամ է դարձել, իսկ վարորդը, որ փլավ ուտի, չի կարող քշել։ Նա հայտարարել է, որ նախկինում ընդհանուր 350,000 դրամ է ստացել, մինչդեռ այսօր ստանում է 260,000 դրամ։

Դեկտեմբերի 13-ի առավոտից հանրային տրանսպորտի մի շարք երթուղիներ չեն աշխատել վարորդների բոյկոտի պատճառով։ Վարորդները հանդիպում են պահանջում քաղաքապետի հետ։ Կանգառներում մարդկանց մեծ կուտակումներ էին։