ԱՄՆ պետքարտուղար Էնթոնի Բլինքենը ՄԱԿ Անվտանգության խորհրդի նիստում հայտարարել է, որ ՌԴ զորքերը պատրաստվում են ներխուժել Ուկրաինա «արդեն առաջիկա օրերին», սակայն, եթե դա տեղի չունենա, ԱՄՆ-ն դա գոհունակությամբ կընդունի։

«Ըստ մեր տեղեկությունների, պարզ է, որ այդ ռուսական զորքերը, այդ թվում ցամաքային, ինքնաթիռները, նավերը, հարձակման են պատրաստվում Ուկրաինայի դեմ առաջիկա օրերին»,-ասել է նա և հավելել, որ Ռուսաստանը կարող է «պատրվակ ստեղծել» հարձակումից առաջ, տեղեկացնում է ՌԲԿ-ն։

Բացի այդ, Բլինքենն առաջարկել է ՌԴ ԱԳ նախարար Սերգեյ Լավրովին հանդիպել հաջորդ շաբաթ Եվրոպայում, ինչպես նաև հաստատել է, որ ԱՄՆ-ն ստացել է ՌԴ պատասխանն անվտանգության երաշխիքների հարցով։

ՌԴ-ն հրապարակել է իր պատասխանն ԱՄՆ-ին, որում 11 կետ կա։ Մասնավորապես, նշվում է, որ «ամերիկյան կողմը կառուցողական պատասխան չի տվել անվտանգության երաշխիքների մասին ԱՄՆ հետ ՌԴ ներկայացրած պայմանագրի նախագծի հիմնարար տարրերի վերաբերյալ», գրում է ՌԲԿ-ն։

ՌԴ-ն պահանջում է, որ ՆԱՏՕ-ն չընդլայնվի դեպի արևելք, մասնավորապես՝ Ուկրաինա։

Ավելի վաղ հայտնի դարձավ, որ Դոնեցկում գտնվող ԵԱՀԿ առաքելության աշխատակիցները սկսել են հեռանալ քաղաքից՝ «Ուկրաինայի վրա ռուսական հարձակման սպառնալիքի ֆոնին»։ 16 երկիր հորդորել է իր քաղաքացիներին լքել Ուկրաինան՝ ռազմական գործողությունների սպառնալիքի պատճառով։ ՌԴ նախագահ Վլադիմիր Պուտինն ի գիտություն է ընդունել Դոնեցկի և Լուգանսկի հանրապետությունների ճանաչման մասին Պետդումայի դիմումը, սակայն նման ճանաչումը համահունչ չէ Մինսկի համաձայնություններին։ Այդ մասին հայտարարել է ՌԴ նախագահի մամուլի խոսնակ Դմիտրի Պեսկովը։

2021-ի աշնանից ռուսական զորքերի կուտակումներ են արձանագրվում Ուկրաինայի հետ սահմանին, ինչի պատճառով Արևմուտքը մտավախություն ունի, որ ՌԴ-ն կարող է ներխուժել Ուկրաինա։ Մոսկվան դա հերքում է։ ԱՄՆ-ն սպառնում է պատժամիջոցներ սահմանել ՌԴ դեմ, եթե դա տեղի ունենա։