Աջափնյակի ղեկավարը դադարեցնում է լիազորությունները

6 ապրիլի 2022 - 18:40 AMT

PanARMENIAN.Net - Երևանի Աջափնյակ վարչական շրջանի ղեկավար Սասուն Մկրտումյանը դադարեցնում է լիազորությունները։ Այդ մասին նա հայտնել է ֆեյսբուքյան իր էջում։

«Այսօրվանից դադարեցնում եմ Աջափնյակ վարչական շրջանի ղեկավարի լիազորություններս։ Նախորդած ամիսներին ես և վարչական շրջանի ղեկավարի աշխատակազմն արել ենք հնարավորը՝ բարեկարգ և բնակիչների համար հարմարավետ միջավայր ստանալու ուղղությամբ։ Շնորհիվ քրտնաջան աշխատանքի մեզ հաջողվել է կյանքի կոչել որոշ կարևորագույն նախաձեռնություններ, որոշները, վստահ եմ, կիրագործվեն առաջիկայում՝ նոր ղեկավարության ջանքերով։

Փոփոխությունների այս ճկուն հորձանուտում միջավայրի գրավչությունն ու հասարակության բարեկեցությունը չպետք է պայմանավորված լինեն լոկ անձերի փոփոխություններով, այլ սահմանված նպատակային ուղենիշներով ու գործուն մեխանիզմներով, ինչին շարունակելու ենք ձգտել միահամուռ ուժերով։

Շնորհակալություն եմ հայտնում քաղաքական ղեկավարությանս վստահության համար, շնորհակալ եմ քաղաքային իշխանության բոլոր օղակներին, շնորհակալ եմ Աջափնյակ վարչական շրջանի ղեկավարի աշխատակազմին, մեր պատրաստակամ բնակիչներին, անհատներին, հասարակական կազմակերպությունների ներկայացուցիչներին և այլոց՝ արդյունավետ համագործակցության համար։ Հաջողություն եմ մաղթում Աջափնյակ վարչական շրջանի նորանշանակ ղեկավարությանը։

Կրկնակի եռանդով շարունակելու եմ գործունեությունս՝ ի նպաստ Հայաստանի Հանրապետության և նրա քաղաքացիների»,-ասվում է գրառման մեջ։