Միրզոյան․ ՌԴ-ից պարզաբանել են` պատգամավորների մուտքը ԼՂ չի թույլատրվում սադրանքներից խուսափելու համար

PanARMENIAN.Net - ՀՀ ԱԳ նախարար Արարատ Միրզոյանը, Ազգային ժողովում պատասխանելով պատգամավորների մուտքն Արցախ արգելելու միջադեպի վերաբերյալ հարցին, տեղեկացրել է, որ ԱԳՆ-ն դեպքից անմիջապես հետո կապի մեջ է եղել Արցախի և Ռուսաստանի իշխանությունների հետ:

Միրզոյանն ասել է՝ ՌԴ-ից պարզաբանել են, որ պատգամավորների մուտքն Արցախ չի թույլատրվում սադրանքներից խուսափելու նկատառումներով։

«Այն պահից սկսած, երբ հայտնի է դարձել, որ ԱԺ պատգամավորները չեն կարողանում Լաչինի միջանցքով մուտք գործել Լեռնային Ղարաբաղ, մենք ձեռնարկել ենք գործողություններ։ Կապի մեջ ենք եղել և Լեռնային Ղարաբաղի իշխանությունների հետ, և Ռուսաստանի Դաշնության իշխանությունների հետ բարձր մակարդակով։ Մեզ հավաստիացրել են, որ Ազգային ժողովի պատգամավորների մուտքն Արցախ չի թույլատրվում սադրանքներից զերծ մնալու նկատառումներով», - ասել է Միրզոյանը։

Ճշտող հարցին, թե ՌԴ-ից են հավաստիացրել՝ Միրզոյանը դրական է պատասխանել։

Նա հավելել է, որ ՀՀ դիրքորոշումը հստակ արտացոլված է ԱԳՆ հայտարարության մեջ, այն է՝ 2020 թվականի նոյեմբերի 9-ի եռակողմ հայտարարությամբ՝ Լաչինի միջանցքով շարժի որևէ սահմանափակում նախատեսված չէ և ՀՀ քաղաքացիները, առավել ևս, ՀՀ Ազգային ժողովի պատգամավորները պետք է անարգել մուտք գործեն Լեռնային Ղարաբաղ:

Ապրիլի 12-ին ԱԺ ընդդիմադիր խմբակցությունները հայտարարեցին, որ բոյկոտում են մեկնարկած քառօրյայի նիստերը և մեկնում են Արցախ և ՀՀ սահմանամերձ շրջաններ։ Ավելի ուշ հայտնի դարձավ, որ ՌԴ խաղաղապահները, թույլ չեն տվել ԱԺ պատգամավորներին մուտք գործել Արցախ՝ ունենալով նրանց անվանական ցուցակը։ ԱԺ պատգամավորները հանդիպել են Արցախի ԱԺ խմբակցությունների հետ Աղավնոյի անցակետի մոտ՝ դրսում, և ստիպված են եղել վերադառնալ Գորիս։

Վարչապետ Նիկոլ Փաշինյանը տարակուսելի է համարել, որ ՌԴ խաղաղապահները չեն թույլատրել ՀՀ ԱԺ պատգամավորների մուտքն Արցախ։