ԱՄՆ դեռեւս չի ճանաչել Ցեղասպանությունը, բայց երեսունհինգ այլ պետություններ արդեն արել են դա: Այդ մասին հայտնել է աշխարհահռչակ շանսոնյե Շառլ Ազնավուրը: «Այժմ մենք սպասում ենք, որ միգուցե Բարակ Օբաման ճանաչի Ցեղասպանությունը: Դրանից հետո, ես կարծում եմ, որ Թուրքիան պարտավոր կլինի նույն կերպ վարվել: Ինչ վերաբերում է Իսրայելին, ապա նրանք, սովորաբար, ցանկանում են լինել միակը, որը տուժել է կոտորածից»,- ընդգծել է Ազնավուրը Hayinfo ռուսական տեղեկատվական պորտալին տված հարցազրույցում:

ԱՄՆ նախագահ Բարակ Օբաման իր նախընտրական ելույթներում ԱՄՆ հայ համայնքին խոստացել է ճանաչել Օսմանյան կայսրության Հայոց ցեղասպանությունը: Ներկայումս ԱՄՆ Ներկայացուցիչների պալատում ներկայացվել է Հայոց ցեղասպանության մասին 252-րդ բանաձեւը, որի տակ արդեն ստորագրել են 88 կոնգրեսական: