ԱՀ արտախորհրդարանական ուժերը սատարում և միանում են Արցախի ԱԺ հայտարարությանը

PanARMENIAN.Net - Արցախի արտախորհրդարանական կուսակցությունները լիովին սատարում և միանում են ԱՀ Ազգային ժողովի ՝ 2022թ ապրիլի 14-ի արտահերթ նիստում ընդունած հայտարարությանը։ Այդ մասին ասվել է Արցախի ԱԺ-ում արտախորհրդարանական ուժերի հետ հանդիպմանը։

Ապրիլի 19-ին ԱՀ ազգային ժողովի նախագահ Արթուր Թովմասյանը, խմբակցությունների ղեկավարների մասնակցությամբ, ընդունել է 2020թ․ մարտի 31-ի ԱՀ խորհրդարանական ընտրություններին մասնակցած արտախորհրդարանական ուժերի՝ «Ազգային վերածնունդ», «Անկախության սերունդ», «Արցախի կոմունիստական կուսակցություն», «Արցախի հեղափոխական կուսակցություն», «Արցախի պահպանողական կուսակցություն», «Միացյալ Հայաստան», «Վաղվա Արցախ» կուսակցությունների ներկայացուցիչներին։

Հանդիպմանն արտախորհրդարանական ուժերի առաջնորդներն արտահայտել են իրենց կարծիքն ու դիրքորոշումն Արցախի հարցի շուրջ, և այդ համատեքստում կարևորել ԱԺ խմբակցությունների միահամուռ ու միասնական գործելու հանգամանքը։

«Կուսակցությունների ներկայացուցիչները շեշտել են, որ լիովին սատարում և միանում են ԱՀ ազգային ժողովի ՝ 2022թ. ապրիլի 14-ի արտահերթ նիստում ընդունված հայտարարությանը»,-ասվում է ԱՀ ԱԺ լրատվության և հանրության հետ կապերի բաժնի հաղորդագրության մեջ։

Ավելի վաղ վարչապետ Նիկոլ Փաշինյանը, Ազգային ժողովում ներկայացնելով 2021թ․ կատարողականի հաշվետվությունը, հայտարարել է, որ միջազգային հանրությունը հայկական կողմին ասում է՝ «մի փոքր իջեցրեք ԼՂ կարգավիճակի հարցում ձեր նշաձողը»։ «Հակառակ դեպքում, նրանք խնդրում են իրենց վրա հույս չդնել՝ ոչ թե չեն ցանկանում օգնել, այլ այն պատճառով, որ չեն կարող»,-ասել է նա։ Փաշինյանն ասել է նաև, որ Ադրբեջանի հետ խաղաղության պայմանագրի ստորագրումը, «որքան հնարավոր է արագ, հայկական կողմի պլաններում է»՝ հավելելով, որ սակայն, որ պատրանքներ այս հարցում չկան։

Արցախի Ազգային ժողովն արտահերթ նիստում հայտարարություն է ընդունել՝ պահանջելով ՀՀ իշխանությունից հրաժարվել իր որդեգրած ներկայիս աղետալի դիրքորոշումից։ Հայտարարությունն ընդունվել է միաձայն։