Հարությունյան․ ԱՀ իշխանությունները չեն պատրաստվում շեղվել ժողովուրդների ինքնորոշման իրավունքի սկզբունքից

PanARMENIAN.Net - Արցախի Հանրապետության նախագահ Արայիկ Հարությունյանն ԱՀ Հաշվեքննիչ պալատի աշխատակազմի պատասխանատուների հետ հանդիպմանը, անդրադառնալով ստեղծված աշխարհաքաղաքական իրավիճակում Արցախի ապագա կարգավիճակի վերաբերյալ տարբեր շահարկումներին, ընդգծել է, որ որևէ պարագայում ԱՀ իշխանությունները չեն պատրաստվում շեղվել ժողովուրդների ինքնորոշման իրավունքի սկզբունքից, և արցախահայության համար խաղաղության օրակարգն ընդունելի է միայն այդ համատեքստում:

Այս մասին տեղեկացնում են Արցախի նախագահի աշխատակազմի տեղեկատվության գլխավոր վարչությունից։

Պալատի նախագահ Տիգրան Ծատրյանը նախագահին է ներկայացրել գերատեսչության կողմից հաշվեքննության արդյունքներով արձանագրված անհամապատասխանությունների վերացման ու հետհսկողական աշխատանքների ընթացքը: Նախագահ Հարությունյանը վերահաստատել է պետական միջոցների արդյունավետ օգտագործման վերաբերյալ ավելի վաղ հնչեցրած իր մոտեցումները՝ նշելով, որ այդ ուղղությամբ Հաշվեքննիչ պալատի գործողությունները բոլոր փուլերում պետք է հետևողական լինեն:

Հանդիպման ընթացքում Արայիկ Հարությունյանը նաև պատասխանել է ներկաներին հուզող հարցերին, քննարկված թեմաների վերաբերյալ տվել մի շարք հանձնարարականներ:

Ավելի վաղ Արցախի նախագահ Արայիկ Հարությունյանը ՀՀ կառավարությունում վարչապետ Նիկոլ Փաշինյանի գլխավորությամբ խորհրդակցության ժամանակ իր խոսքում ասել էր, որ արցախահայությունն ինքնորոշման իրավունքից շեղվելու որևէ ուղղություն չի տեսնում։ Նա նաև հավելել էր, որ հնարավոր չէ մի փաստաթուղթ, որն Արցախի ժողովուրդը մերժի: Դա մենք բոլորս հասկանում ենք և այդ առումով հասկանում ենք նաև, որ երկար քաղաքական պայքար ունենք տանելու: