ՀՀ ԱԳ նախարար Արարատ Միրզոյանը ՀԱՊԿ անդամ երկրների ԱԳ նախարարների խորհրդի նիստի ավարտին լրագրողների հետ ճեպազրույցում, անդրադառնալով Ադրբեջանի ներխուժմանը ՀԱՊԿ-ի արձագանքման խնդրին, ասել է, որ այդ հարցը միչև հիմա բաց է մնում։

«Հունվարին կազմակերպությունը ժամանակին արձագանքեց Ղազախստանի իրադարձություններին։ Բայց մինչև հիմա բաց է մնում ՀՀ ինքնիշխան տարածք ադրբեջանական զորքի ներխուժման հարցը` 2021-ի մայիսին»,– ասել է Միրզոյանը` ներկայացնելով նիստի ընթացքում քննարկված հարցերը, որոնց թվում է եղել նաև ՀԱՊԿ արագ արձագանքման մեխանիզմների թեման, գրում է Sputnik Արմենիան։

«Սկզբում նեղ, ապա և ընդլայնված կազմով մենք ՀԱՊԿ անդամ երկրների ԱԳ նախարարների հետ քննարկել ենք միջազգային ու տարածաշրջանային անվտանգային միջավայրի տենդենցները, շոշափել ենք նաև ՀԱՊԿ–ի ճգնաժամային արձագանքման մեխանիզմների թեման, որը, ինչպես գիտեք, հանդիսանում է հայկական նախագահության առաջնահերթությունը»,– ասել է ԱԳ նախարարը։

Միրզոյանը վերահաստատել է, որ Հայաստանը հավատարիմ է մնում ՀԱՊԿ–ի հետ նախաձեռնողական համագործակցությանը։

2021 թվականի մայիսի 12-ից ադրբեջանական զինուժը ներխուժել է Հայաստանի ինքնիշխան տարածք։ Նրանք գտնվում են, մասնավորապես, Սյունիքի Սև լճի շրջանում՝ փորձելով ամրապնդվել այնտեղ, ինչպես նաև Գեղարքունիքի մարզում։