Ֆրանսիայի դեսպանը Սյունիքում է․ Մարզի զարգացմանն առնչվող հարցեր են քննարկվել

PanARMENIAN.Net - Հունիսի 16-ին Սյունիքի մարզպետ Ռոբերտ Ղուկասյանն ընդունել է Հայաստանում Ֆրանսիայի արտակարգ և լիազոր դեսպան Անն Լույոյին․ քննարկվել են բազմաբնույթ հարցեր, որոնք վերաբերում էին մարզի զարգացման հնարավորություններին և ուղղություններին, ենթակառուցվածքներին, զբաղվածությանը, կրթությանը, զբոսաշրջությանը, Արցախից տեղահանվածներին և այլն։

Հանդիպմանը մասնակցել է նաև Կապանի ղեկավար Գևորգ Փարսյանը։

Մարզպետը ողջունել է դեսպանի առաջին այցը Սյունիք ու կարևորել է ֆրանս-հայկական բարեկամական հարաբերությունները։

Համայնքի ղեկավարը շեշտել է ֆրանսիացի արդյունահանողների դերը Կապանում հանքարդյունաբերության ու քաղաքի տնտեսական զարգացման գործում, որը հետագայում դեր է ունեցել հայ-ֆրանսիական կապերի ամրացման համար։

Ղուկասյանը ներկայացրել է մարզի տնտեսության կառուցվածքը, տարբեր ոլորտների վերաբերող ցուցանիշներն ու առաջնահերթ լուծում պահանջող խնդիրները, որոնց լուծմանը կարող է աջակցել ֆրանսիական կողմը։ Բարձրաստիճան դիվանագետը նշել է, որ Սյունիքը կարևոր ռազմավարական նշանակություն ունեցող մարզ է Հայաստանի համար, հատկապես՝ 2020-ի պատերազմից հետո։

Մինչ մարզկենտրոն հասնելը դեսպանը տարբեր հանդիպումներ էր ունեցել, այդ թվում՝ սահմանային գյուղերում ու նշել, որ որոշակի պատկերացում ունի բնակավայրերի կյանքի, մարդկանց խնդիրների մասին, բայց առաջին հերթին մարզային իշխանությունից է ցանկանում լսել դրանց մասին։

Դեսպանն առաջարկել է Գորիսի օրինակից բացի միջմարզային բարեկամություն հիմնել կամ մարզի այլ քաղաքների հետ էլ Ֆրանսիայից քույր քաղաքներ դառնալու հնարավորություն ստեղծել․ մարզպետն ու համայնքի ղեկավարը ողջունեցին գաղափարը։