Դերասան Վարդան Պետրոսյանը, ֆեյսբուքյան իր էջում անդրադառնալով դատարանի դահլիճում Արմեն Գրիգորյանի մահվանը, գրել է` հույս ուներ, որ լուրջ փոփոխություններ կլինեն դատաիրավական համակարգում։
«Փաստորեն`ոչ։ Դուք օրինական ժառանգորդներն եք նախկինների և նրանց գործի շարունակողը։ Խորին ցավակցություններս` հարազատներին…», գրել է նա։
Նա նշել է, որ դա պատահականություն չէ, այլ պատկերն է մեր այսօրվա դառը իրականության։
«Սարսափելի բան… Բոլորի աչքի առաջ, դատարանի դահլիճում մահացավ Արմեն Գրիգորյանը… Իմ դատավարության ընթացքում ես ինչ ասես տեսա` ուշագնացություն դահլիճում, շտապ օգնություն, ուշագնաց փայտացում դատից հետո, ինչ ասես… Բայց սա անմարդկայնության բոլոր սահմաններն անց է…
Եվ սա պատահականություն չի, ոչ։ Սա պատկերն է մեր այսօրվա դառը իրականության… Սա հուսահատ ճիչն է այսօրվա անհուսության…
Բողոքի ճիչ` սրիկայության, ստորության, ապիկարության, անհոգության դեմ…»,-ասվում է գրառման մեջ։
Հուլիսի 15-ին պրոդյուսեր Արմեն Գրիգորյանը մահացել է դատական նիստի ժամանակ։ Նրա ինքնազգացողությունը վատացել էր դատական նիստերի դահլիճում: Երբ պաշտպան Ռուբեն Մելիքյանը ներկայացնում էր միջնորդությունը՝ Արմեն Գրիգորյանի ինքնազգացողությունը վատացել է, նա կորցրել է գիտակցությունը։ Նրա կյանքը փրկել չի հաջողվել։
Արմեն Գրիգորյանը կալանավորվել էր մայիսի 17-ինՀՀ քրեական օրենսգրքի 226-րդ հոդվածի 2-րդ մասով նախատեսված հանցանք կատարելու համար, այն է` հրապարակայնորեն կամ լրատվության միջոցներ օգտագործելով` ազգային, ռասայական կամ կրոնական թշնամանք հարուցելուն, ռասայական գերազանցությանը կամ ազգային արժանապատվությունը նվաստացնելուն ուղղված գործողությունները։