Ստեփանակերտում կրկին հանրահավաք էր

PanARMENIAN.Net - Ստեփանակերտի Վերածննդի հրապարակում սեպտեմբերի 15-ին վերսկսվել է նախօրեին մեկնարկած ինքնաբուխ հանրահավաքը: Հանրահավաքին մասնակցել են բազմաթիվ քաղաքացիներ, այդ թվում՝ բուհերի դասախոսներ, ուսանողներ, դպրոցականներ և ուսուցիչներ, հիմնարկ-ձեռնարկությունների աշխատակիցներ:

Ելույթ ունեցողներն իրենց մտավախությունն են բարձրաձայնել սեպտեմբերի 14-ին Ազգային ժողովում վարչապետ Նիկոլ Փաշինյանի հայտարարության և Արցախի ճակատագրի վերաբերյալ, գրում է Արցախպրեսը։

Հանրահավաքին ներկա էր Արցախի Ազգային ժողովի նախագահ Արթուր Թովմասյանը, ով հանդես է եկել ելույթով՝ ընդգծելով, որ ԱՀ ժողովրդի փոխարեն ոչ ոք իրավունք չունի միանձնյա որևէ փաստաթուղթ ստորագրելու՝ Արցախի կարգավիճակի վերաբերյալ, որը դեմ է Արցախի շահերին:

Խորհրդարանի ղեկավարը ներկայացրել է Հանրապետության նախագահի՝ նախօրեին արած հայտարարությունը՝ վերահաստատելով, որ անընդունելի են բոլոր այն փաստաթղթերը, որոնք կարող են Արցախը ճանաչել Ադրբեջանի կազմում:

Հանրահավաքում ելույթ ունեցողները պահանջել են երաշխիքներ՝ Ադրբեջանի կազմում Արցախի չհայտնվելու վերաբերյալ, ինչպես նաև հարգել Արցախի ժողովրդի կամարտահայտության իրավունքն ու հավատարիմ մնալ Արցախի Հանրապետության անկախության ուղեգծին:

Հայտարարվել է, որ հանրահավաքը շարունակվելու է նաև երեկոյան՝ ժամը 19:00-ին:

ՀՀ վարչապետ Նիկոլ Փաշինյանն սեպտեմբերի 14-ին Ազգային ժողովում հարցուպատասխանի ժամանակ ասել է, որ այս պահի դրությամբ ադրբեջանցիները ևս 10 քկմ օկուպացրել են մեր տարածքից։

Նրա ելույթից հետո մեծ բազմություն է հավաքվել ԱԺ մոտ և հրապարակում՝ կառավարության շենքի մոտ։ Ցուցարարները պահանջում էին անվստահություն հայտնել վարչապետին: Ավելի ուշ Փաշինյանը գրառում էր կատարել ֆեյսբուքյան էջում՝ նշելով որ ոչ մի թուղթ չի ստորագրել և չի պատրաստվում ստորագրել, և որ նրա խոսքը խեղաթյուրվել է, այդ թվում՝ ԶԼՄ-ների կողմից։ «Կոչ եմ անում, խնդրում եմ, հորդորում եմ մանիպուլյացիաների չտրվել»,- գրել էր նա, այնուհետև նույն միտքը կրկնել ֆեյսբուքյան ուղիղ եթերի ընթացքում։